Zaanlei

A luan cia mi zaanlei sangah thil sining hna cu mati hin an rak um. Mitthli he ka hmaika ah a dir, a kutkum pahnih in a țah aw he ka țang cu faktuk loin a cumh. Cu hnu ah a ka kuh i a ka rehchih. Na kal tak ko lai maw siloah zeibantuk timhtuah nak dah na ngeih- a rak ka ti ah khan a biafangkhat lehnak ding thazaang ka rak ngei lo. A mitthli hna cu a lu a chiahnak ka liang cungah an țil, sian lonak biafang bal nih ka țang faktuk in an rak den.

Na ka duhtak si ahcun tonțhan nak caan kan ser hrimhrim lai tiin a lung ka nawl ah khan, hmaitonh in hiti hin a rak ka leh!- hi dirhmun hi na theih ko cuta zeitik tiang dah keimah nih hngahnak nawl kan ngeih lai, na hngalh ko cuta na um locun thaizing kiptuh a ziam dingmi pangpar men ka si hi. Cu lawng sirih lo fahnak cu keimah pakhat nih a za in ka tuar asinain ka nun bal te cu keimah ta asi lo, ka nulepa kut ah a um,Cun" nangmah ta ka si. Asinain hi nun nai laak duh lo vaivek ahcun keicu ka kal taak ko, keizong ka rak liam ve lai.- timi bia cu a țah aw he a thazaang ngeihchunh chuah in a chim ti zong a mit au, a ik aw sin in an fiang. Kei nih teh zeitin ka leh lai, ka dangah zeidek i taap sehlaw cuko cu a lo hnemhnak ding biafang an tlawt kho lo. Mitthli bal lei ro ah dorkhar hnu dorkhat ka zoh mi vawlei a ciap tiang.

Cu zaanlei cu kan mah pahnih chim lo vankam i a dir mi ninu tiang nih a kan tuarpi ve dara ti awk in, a mitthli ai thloh lai phan ah a hawikom khuadawm i sawm zau in tlang a liam. Asinain zaan hnawmhtamh lai phan ah thlapa nih ready tein khuamuih lai a hngah. A nih zong keimah bialehnak hngak in a dirnak hmun ah a totum in a țhu, a lu ai khun i fak ngai in a zoh mi vawlei ah a mitthli hna cu vanruah ti bang kurkur in an zut. Aw mi fanu keimah na rak ka duh hi na tuar har hringhran dah mu tiin keimah le keimah biahalnak fak pi zong kai tuah, Cun kai timh mi zalam in kir awk ka țhat ti lo zong kai fiang. 

Cucu a mah ka duh lo ruang siloin a cang cuahmah mi thil sining cohlan khawh ka hauh caah si. Vawlei ah hin duhnak pakhat lawngin eibaar a chuak hrim lo. Nulepa pilepu nih timhtuah nak an ngeih piak mi cu a țha lomi asi lai ka zum lo, hmailei a lamthluan ah ai nuamhnak ding asi ahcun keimah a dawtu nih kal taak a hau ti ka hngalh. Imm- sining nih nun cu a rak tlinh hrim lo mu.

Chun ai dawhnak a thuamtu ninu a liamnak a sau cang. Kan nih pahnih zong hi hmun ah kan dirnak a sau ve cang. Khuamui nih ai dawhtuk mi zaanlei sang zong zaan sinah liampi a zalh. Asinain thlapa nih zaan ai dawhnak tuammuai dingah arfi i sawm in vankip ah an de lulh. Lamkam i an phun mi meiceu hna zong nih an ti khawh tawk cio chuah in zaan ai dawhnak a iang hna cu an thuam. Kan cung i ai thlai mi Elecktrik meiceu nih a thinlung in ai sem mi a biangnem cungah a vun tolh ziahmah mi a mitthli hna cu fiang ngai in an ceuh i lungvaar phunkhat hluan in an tleu. Pawngkam ah rian in a țin mi mirun zong an i suallulh ti kan hngalh ko nain mit nih a hmukho hna lo.

 Kha zaanlei kha zeithei loin zalam pi cungah a tli mi mawtaw si zong ka rak duh. Tlawmpal a tha ai hrim hnu ah a țhutnak in a von dir, a thaw fak piin a chuah hnu ah a caorh lei kutpi in a mitthli ai hnawh pah khin ka kut kuthnih in a tlaih i fak ngai in a hum. A ik aw he nucan cuh in- kan ngaituk te lai, tuzaan hi a donghnak hi hmun kan i ton zong asi kho, nangcu na kal lai. Kei bal hi hmun ah nang ngai in kai tiamte lai, hi liocaan ah hin zeitluk in dah kan ngaihte hnga' a ruahtonh awk zong ka hngal lo, ruah ah a lung a caw, nun a ip. Cun mu keimah kut ah hi duhnak hi zeitik tiang dah umnak nawl a ngeih lai. Zeitik tiang dah keimah nih hngahnak nawl kan ngeih lai tihi ka philh piak hlah mu. Nithla hi hngaktu caah a liam hartuk te lai ti zong atu tein ka theih cia. Hlawhtlin timi hi nikhat hnih rian a silo ka theih ko nain tlamtlin zokzok von i zuam mu, thla kan rak cam piak peng lai. Ati hnu ah duhsah tein ai her i a hnu lei a ka chih. 

zeibia hmanh chim ka tim lo a mitthli tlak țhan lai dingzong ka țih. Cun" karkhat hnu karkhat a ka hlaat.

A lamkal ah nunnak thazaang ngei lo ko a lo. Har ngai in a hlan mi a kekhap nih a duh nunnak iang hna an chuah ter khun. 

Mitthli hi lawmhnak ah an cang tawn anti nain kan nih pahnih caah cun mitthli lila ah an cang.  Cutincun' mah zaanlei kan i ton kha a a donghnak kan i hmuh cu silo nain a donghnak kan i then tu a rak si.

   Sining Le Nun

ining nih a tlinh lo tik ah 

Nun cu harnak he neihniam tein.

Chikhat

Caankhat 

Ka banh manh mi na iang

Ai khirh lelek mi mitthlam sin

Ngaihnak, tlaihchannak,duhdawtnak

Zingtin an thar ko dahkaw.

Kan sianțung lo 

Mitthli rualriak he nolh lengmangin nawl in

Sinning nih a tlinh lomi saduhthah

Hi nun lila sualphawt siko hnga.

Ni...nikhat

Caan...caankhat ah

Sining nih a pek lomi nun hna kha

Kan lungkil in kan vun theițhan te lai.

Dai tein liam mu

Diriam tein nun i zuam mu

Kei" it lo hngak in

Mangmanh caan hmanh ngei loin

Kan hlamte lai.

ooooooooooooဝဝဝဝဝဝဝဝOoooooooooo

"The end''