Facebook In Atak Dawtnak

 

Zinng 11:00am hrawngkhi asi,ka phone contact ah kadawt tiin ka save mi phone number nih ruah lo piin a van ka chawnh. Ka hmawmang loin Hello? ka vun ti ahcun na rak kai cang maw Thawng timi bia nih thaizing Ambi ah kan i tong lai kan timi aka theiter. 

Ka tlai cang nizaan i kan i timhnak ahcun 10:30am ah i ton dingin kan i chim. Atu cu 11:00AM atling cang.Leklak ka tho i kholh nak khan ah ka lut colh. Ka sut-khet chung i ka fimziar mi ka thil lak ah kai remcem ka timi le a man lei zongin a sang cemmi kai hruk.Thlalang hram ah ka sam hna cu a cheu cunglei ah ka pirhter a cheu tanglei ah ka thlak. Kan ngakchiat lio Nay-Toe sampung kan timi pungsaan khin ka van i tuah ahcun Laikhal lakah Korea pacio ti phun khin lung hmuihnak he ka khat.

Cuticun, thlalanghram ah saunawn kai tuai hnu ah a țet nawn cangmi ka keden ka vanzoh, a tteh lawnghlah a hnawnh hrim a hnawm.Denh ding le denh lo ding sau nawm te kaa el hnu ah denh lo ahcun denh ding dang hlei ka ngeih lo caah tile barat in fukfak ka hnur i kai hruk(denh).A tha tuk lomi ka bag i bei in bus-stop lei ah hnawh sare ngai in kai chaih.

Bus in kal ahcun a tlaituk ding ka si caah ka Malay holh thiamchunh tein Taxi kai hlan. Jalan Imbi 7eleven ka vun ti. Taxi mawngpa zongnih mithmai panh tein boleh(angah ti nak) a vun ka ti i ka kai hngap. 

 Lampi thluangthluan kan i tong lai i zeitindah biahram ka domh lai timi lawng ka ruat, cu nihcun lampi thluangthluan um thiam loin a ka tuah. Kan ngakchiat lio cazoh bangin biachim ding tampi kai ciah cia.Kan i tong lai i a ruah lo ningleng in a mitzoh ah ka niam sual hnga maw timi ka ruah ah chikhat cu ka thawchuah a pit mi ko a lo. 

A tu kanchan cu kan theih nan theih cio bang internet(facebook) rumro hmangin nungak tlangval i lenkai asi cang.Cucaah keimah bantuk ai dawh huaha lomi zongnih facebook chung ahcun darling i chiah cio a si.(a tlawm le tam thu).Culak ah kei zong online in dawtmi kai hmuh ve. Iangku he hin ai hmu bal in aa thei hngal bal kan si lo,facebook chung kan hmanthlak kan i hmuh nak lawng in asi. 

 Cuticun caan sin ah kan i ngamh tlak deuhdeuh i kan thinlung ruahnak kan i theithiam.Kan sining zong theih awktlak cu kan i chim kan i thei,hawikom dawtnak phen ah a um rih mi zei zongza a huap kho tu duhnak nih kan thinlung mit kan theih lo kar ah a rak cawtter.Kan theih lo kar ah kan thinlung a rak i hmu diam cang.

Zaankhat a aw theih lo le a hmanthlak zohta loin ih cu ka nunnak ah zeidek bau mi ko khi a lo kai hngilh kho tawn lo. Facecebook nih a kan theih ter i a kan chonh ter, akan hmuh ter.Kan thinlung zong dawtnak ah a mit a dei ter phah.Cucaah online hi thangthat a phu taktak kei caah cun:-) ka voi khatnak nungak ton a si caah ka zenh ngai nain a mui hmaihmuh lai kaa ngaihnak nih an tei deuh.Timesquare (shopping) tang ka phak ah Iangku nih cun a von ka chawnh than.

"Tawng na phan deng maw,?

Aw.... timesquare tang ka phan fiakfairok Laidawr in kan hngah hi mu a ti vial ah a phone a thah. Mah Laidawr cu malaysia Lai khualipi (Laimi an tambik nak hmun) a si caah nungak tlangval i tonnak ahcun an hman ngai mi Laidawr pakhat asi. Ai naih chin lengmangbang ka thintur zong a rang chin leng mang ve. Ka khuaruah sin caan rau lo teah ka kan i tonnak ding hmun ka phan.

Khoika hmanh kal loin Fiakfairok Laidawr cu ka hei fuh colh. Khongtaa hram ah a mah te lawng phone deh pah in a thu mi khi ka hei hmuh, a photo he aa danpah caah ka van palh pah hrulhhralh.

A cheu cu an photo nak in a tak ah ai dawh lo deuh an um tawn, a ruang cu 360 camera☺ a cheubaak cu an hmanthlak nak in a tak ah ai dawh deuh mi zong an um ve thiam. Culak ah iangku hi a photo nak in a mihring ah a let za in ai dawt deuh ti ning law ka palh lai lo, rumra a ngei.

Ka lei hin tiphun khin a baan a van thlir,

"aw Iangku kan palh deng cu teh ti pah in ka kut ka chanh i kan kut kan i tlai.

Ka tlai sual sorry mu na ka hngah nak sautuk maw? 

Asau pah cang umm.

Kan hmaika ah Coca Cola bukhat veve i hunh in hmaitonh in kan thu, tanglei ah a lu a khun i a hmaicheu cu a samfa hna nih an khuh. Phone chungbang in kan ral cu a tha lo, kan i zoh i kan i mirh nain bia kan chim lo. Biachimding kan ngeih locu asi lai lo dah, kan chimngam lotu asi deuh rua. A ka zohnak mit ah tlaihchan nak ai sih, tlaihchannak nih i theihthiam nak a zaza a zawi. A thlumtuk mi dawtnak bia hna kan izoh nak mit kan i mirhnak hmur nih an phuan veve ko lai dah.

Iangku a mirh ko ahhin ai chuah pimi a ha-tian rem le a pantuk lomi a hmur an i rem khawh ning, zoh ah hathi thak khin a um. A sentuk lomi a biang nih Eden dum laifang ei lo ding thingthei khi bang koh(tlawh) duh ding in ai tuah, mit a thi ha- thi a thak. A samtom a orh lei liang ah ai thlak i a mit sir tein a van ka met ko ahhin ai dawhnak huham (power) nih ka thawchuah a mah kello in an phundan ter.

Ka voikhat hmuhnak in elawk tha loin ka duh mi cu iangku lawnglawng hi asi. Amah nih teh a ka duh ve hnga maw..? Zeitik ah dah bia a chim lai i ka leh lai ti khi ready tein ka bawh peng sehlaw kaa lawh ter. Keizong zeitin biahram domh ding ka thluak le ka thinlung nih manh lo ngai in an ruat.Lungthin in chim mi biafang cu a ngai tu thinlung nih a theihthiam theu an ti bang a theihthiam tuk ko lai tiah ka ruah. 

A nem tuk mi a aw in--

Thawng kan i tong i kai lawm tuk, na hmanthlak nak in pei na mithring ah nai dawhdeuh hi.

A mirh ngai mi mithmai he a van ka ti ko:-D.Fak tu a tong bal ve lomi kei caah i lunghmuih lo awk tha lo khi si. Ka ha-ni ka khumh kho lo. Ka hnar hi kuttum tia hrawng cun a puar men lai ti awk in, zei poilo nawnkhin biathiam phun in i la hlah- nangmah ko hi teh na mithring ah nai dawhning hi. Cun" uar zong na um tuk, ka vun ti ve. 

Zakzum ngai le mirh nawn khin a mit sir in a van ka zoh pah in sitak maw aih kai zumh la hih. A dang pehtim tilo.

Umm si tak " ti pin a dang ka peh kho ve lo.

Iangku hi michuak thiam mipum ruatha ka chim cang bang Pathian nih iangku iangtu ding minung a ser philh men hna lai tiawk in ai dawh.Iang hi amah ca hrimhrim ah a ser tikhawh zong a si.Vawlei nih ai dawh nak hna tahchunh ding zong an zawi lo asi kho men.A min hmanh ah iangcer va sikaw ai dawhning tluk in chim phuankhawh ding hi a har ngai.Ka zoh deuhdeuh ka duhnak hna furcaan tiva reek bang a țhang deuhdeuh ve. Biachim ding tampi a ngei ve lai ti cu a thut to in ai thei.Kei mah nih bia hram ka domh lo caah a chim ngam lo a si men lai.

Phone chung kan i chimh mi dawtnak bia lawng cun a za lo. Hmaitonh in duhnak bia ka chimh hrimhrim a herh, chim ding zong in kai tim. Ka thluak le ka thinlung nih ai timh bang ka hmur le kaa zong nih ready kan si tiphun in an van cawl ve. Abo tuk tawn mi ka aw zong a nem khawh chung in chuah ka van i zuam.Ka aw a ther lai ti phan ah ka hrom ka van thanh. Ka thaw fak nawn piin ka chuah hnu ah.

Iangku kan hmuh hlan na photo lawng hmanh ah kan rak duhtuk cang va sikaw. Atu kan hmuh hnu ah zei tluk in kan duh ti hi ka hmur le ka ka nih a chim thiam in an tlinh lai lo dah. Hmanhseh" na ka theihthiam lai tiah zumhnak ka ngei.

Ka hmur nih kai timh mi biachuak put a chim nain ka aw a lai ti cu ka theih. Duhtuk mi hmai ah hin cun zeibantuk patthawng le muidawh hmanh an ther cio ko lai dah. Ka thin cu daramtum bang ka taang chung ah ttuk...tuk..tuk. in aa su.

A kik i a dai ngai mi iarcon zong nih an chei lo ka thlanchuah hram an thok.

 Ka chim mi bia nih a nun ah faktuk in rian tuan sehlaw a lo, tlawmpal holh lo in kan dai.

"Cu hnu ah kan mah pahnih lawng theih ding- diin nawnte khin 

"Thawng kei caah cun ruah ding um lo online ka biakam ning te khan kan duh tuk ko, kan hmuh hlannak hmanh in kan hmuh hnu ah kan duh a zual". 

A van ka thuat ko, thuat ti tik ah ai dawhtuk mi bialeh nak in a ka thuat ka ti bia awh, mah bia ka theih cun ka thintur thawng vialte cu chikhat te ah ti bang a von nem i horha bang a thiang ziahmah. 

 Hihi kai ruahchan mi bialehnak a si. Kei ruahchan bantuk tein ka sin ah bialeh nak arat tikah lawmhnak in ka khat,kai nuamh tuk ah i hlawh len i au len ko khi ka duh.

A bia pehpar ah.

"Thawng na ka duh tak bal lai lo..a ti-

"ummm, a ngai ngai ti ko lo ah keimah nih ka duh deuh ving lai. Mah bia hi cu ai lunghmuih tukah a chim mi bia asi kho. Kan pahnih in nuamhnak in kan khat ticu iangku mithmai in ai zoh kho. Dawtmi he len ti caan ahcun vawlei hi philh sual a fawi anti bang kan philh taktak ko. Ka hna nih a thawtnam a teh bal ve lomi dawtnak bia. Atu ka duh tuk minu sin in ka tep cang.

Cuticun kan mah pahnih lawng theih ding in dawtnak bia zaza kan i kheih. Iangku bia ah kai lung hmuih khun mi-

"Zumhtlak tein ka um piak mu keizong nang caah zumhtlak nusal si kai zuam lai" 

ka uar tuk ah nolh ter than ka duh .

Second fung nih din loin ai tinh mi hmun sinah ziahmah tein  kaar a hlan sin tunai te hlah maw asi ko kan ti mi ah caan nih a hun ka hro manh. Zeikar ah 6:00PM asi manh zong theih si lo. Rak duhtuk mi he um kal ti ah hin cun caan hi a kal manh theih si lo an ti mi a tu ceo lawng in kai fiang.

Nikhat hi mitthep kar hmanh asi tak lo.

Ka lawinak ding ai hlat caah ka tin pah lai Iangku ka vun ti.

 Aw... si tak tlai hnu ahcun bus zong a har lai si,kan thlah lai bus-stop tiang',

 ati i a bag a keh lei liangah a von i bei- a orh lei kut in ka baan ai tlaih i Cuticun tlo ngai in Bus-stop lei cu kan fuh.

"Thawng nihin cu kan i tong i kai nuam tuk cun kai lawm fawn. Kan tuanbia cahmai ai thok nak asau cang nain tuni lawng ah cahmai chung ah cafang kan tial. Cu cafang cu a thukbik thinlung kil-ne ah fimziar usih mu. Mi zeihmanh nih phiatkhawh lo ding in. Apeh rih a bia . Cun" Thawng nithum ni na offday ahcun kan lengpeng mu keizong nithum ni ah offday ka la thai cang lai. Cu lo ahcun kan ngaituk sual lai.

Umm iangku nih hin keimah nih ka duhtluk tein a ka duh ve ko ti kai fiang i kai lawm. Ka girlfriend a hmasa bik a si bang a zungzal in zungzal tiang ka thaisung si ding in ka lungthli tein bia ka kamh.

Iangku hmaizarh cu (cinema) kan zoh lai mu dam te kan um ahcun...

"Awkhe, kai ngaih ning a ti pahkhin ka baan a tlaih mi a vun rengh deuh.

Cu zaanlei cu voidang kel bang Bus-stop ah bus hngak mi an um lo, a kiangkap bel ah nungak tlangval a khuah khuah in ai kup i ai rek mi mit nih hmuh khawh mi an tam ial. Bus hngah pah in lam pawng meiceu kan cuan ti.

 Kuala Lumpur zaan hna cu Electric meiceu nih zaan an pen.Laitlang kha cu sisehlaw thlapa nih zaan a pen hnga.Inn dot sang cung in meiceu phuntling nih thep dipdep tete in Kuala Lumpur ai dawhnak hna cu an thuam. Ka pawng i a thu mi iangku lampawng meiceu nih a a vun cerh ko ah hin khuazing

kutzung hi iangku sin ah hlah maw ai remcem ko vunti awk in zoh a rem.

Kik zialmal tein a hrang mi thlizil nih a samfa hna cu ka biang cung ah an van huai len..

Lilen nak le tihphan nak in a khat mi hi ramdang ah dawtmi he um ti ah hin cun khoika an tlau manh zong theih a rak si lo. Caan rau lo ah ka liangcung ah iangku lu a vun tlu ziahmah. 

A hmui mi a samthuh rim hna nih thawchuah an ka sian ter lo. Ka lu duhsah tein ka van mer , a biang ka keh lei kut in ka van kuaih deuh,a sam hna cu a cal in ka hun hlim piak. Cuticun ka hmur nih khoi ka lei a panh ka thei lo nain mitchimh buin iangku nih a ka don ve timi cu ka hngalh. Duhnak nih zeihmanh a tih lo pawngkam mi an um le um lo a tuak lem lo. Kan thinlung mit a caw kan thawchuah a rit, chikhat cu vawilei kan philh.

Cu vial ah Bus zuul pa "kotaraya kotaraya" ti au thawng nih zei athei lomi kan thinlung cu a thangh.Lachon bang a nem mi akut tlaih buin mangtha tuk mu iangku ka vun ti, i lunghmuih nak in a khat mi mit-au he nangzong mangtha tuk ve,na mang ah ka hmu te mu Thawng"

"umm""nangzong mu ti pah in anem tuk mi a kut thlah in bus lei cu ka panh

😐😐😐😐😐😐😐😐😐😐😐

😐😐😐😐😐😐😐😐😐

😐😐😐😐😐😐😐😐

😐😐😐😐😐😐😐

😃😃0😢😢

Note: Lai Sianghleirun Siangngakchia buu Kalay nih Lai Mekazin Avoi 8nak an chuahmi ah rak talh cang mi asi.