Atak Lo Mang

2:30am hrawng asi cang"
A caan a tling- zinglei nazi pathum le cheu ahcun buainak siam dingin bosspa nih nawl pek kan si. ka hawi le pali he kan bawngbi tai ah rianrang in pistol pakhat cio kan i tanh i kan hnakhaw ah lang lo dingin hla ngaihnak hri kan i tonhcio hna. Cutin cun Club pakhat ah kan lut. A sang ngai mi cabuai fate hram ah a țhut zong țhu lem lo khin kan pawngkam minung kan ngia hna- meiceu nih țhep dipdep tete khin muici phuntlingin an ceu. Minung pakhat mui hliah har fangfang khin cu Club chung cu a mui- kan mui a kan hliah lai phan ah luhkhuh kan i khuh cio. Cun" angki bansau le bawngbi sau, kedenh zong a special deuh mi kan i hruk. Hi Club hi voihnih ka ra cang. An rianțuan zeitin si, ziah mati hin mileng an ngeih timi le zeitindah hi Club hi kan mah tlaih mi Club nih a laan khawh lai timi kong lehla ah ka ra- An ropui ve hrim, an Club a kau i a hmunhma hrim zong nih a pek. Cun Thailand Nu deuh an zuat mi hna an si caah mi zeipaoh nih an van fuhpanh nak hna hi asi lai tiin a phi ka hmuh. Hla asa na, a lam na, beer a ding na tiin a ken kip ah an i suallulh cio. Kan nih zong a rauh hlan ah kan țhutnak cabuai cungah Beer tower pahnih an vun hun colh. Kan hram ah nungak beer țhemhtu le zimuai tu panga ruk an i hel, a chel caan ah hnahnawh nak a kan pek țheo.


Hi Club hngaktu gengster(ကိန္းစတာ)hi an chah ngai, atu zong kan pawngkam ah minung pahra hrawng an i hell, zeibantuk thiamnak le thluak an ngeih kan hngal hna lo nain țihnak pakhat hmanh kan ngei hna lo. Ma balte fimkhur tein kan cawl cangh a hau ti cu kan i fiang.. Duhsah tein kan i hunh mi beer din pah in zeitin khua kan khan lai timi kan ruat" kan i caih. Jack nang kutka hrambak khan mawtaw ready in rak chia. Cun" kei le roney nih an Office kan luhhnawh lai i John nih kan țhutnak hin kan hngakseh. Kan i manh bak in mei kan hmih lai. Cun" Club chung ah hin meithal voihnih kan puak lai i a herh ningin kan cawlte hna lai tiin biathil kan i chim. .....

Mi mit a vun tlawm deuh khin kei le Roney cu kan i zukphiak i Club cung an office ah kan kai. Vanțhat ah minung pakhat lawng nih an Office a rak hngah lio celngel asi. Khah- Roney nang kutka hram in mi ka ven piak hna law kei nih khi pa khi cu ka țhuat lai i cu hnu ah a herh mi tepawl ka copy te lai ka ti i Roney nih innka hram in mi a ka cawngh piak. Fawi tein an office hngaktu pa cu ka thluk colh. Cuticun a herh mi an thilri ka zoh dih hnu ah Copy a herh mi ka vun tuah. Cu lio ahcun minung pathum an vun lut i pistol in an ka ching colh. Na kutthlir an ka ti i zeitin hmanh in cawl manh awk a țhat lo caah ka kut cu ka thlir piak hna. Cu tlawmpal ah Roney nih an hnu lei in sumphomh in a vun phomh hna i an dirnak hmun ah an ril viar. Meithal a rincang tik ah zaam a hau, Copy ka tuahnak memory ka dawh zawkzawk i mei ka hmih dih hnu ah lenglei ah rian rangin kan chuak- kan hnu in an vun kan kah thluamah. Mei ka hmih dihtik ah kan mui kan i hliah lo i ho hmanh kan i khengkho lo ..Meithal thawng pehtlai in a ring. John nih tanglei i a rak kah thluamah ve hna. Club chung i a lam cuahmah mi le a ding thluamah mi zong an lu kha loin an zaam cio hna.

Kan hnakhaw i kan i tanh mi phone in "John mawtaw chungah rak lut chung"
Kan ti i kan nih zong dotkhatnak thla la awngin tanglei ah kan zuang. Kan pawngkam ah raldo lai dingbang police mawtaw aw thawng a thang ziahmah. Kan zuannak in kan tlaknak hram ah Jak nih mawtaw khul rang in a vun tlikter i mawtaw chungkan luh bak ah Police nih kan mawtaw ke a kan kah piak i kan zaam kho tilo- an vun kan kulh, meithal sau he tawi he an vun kan ching- cawl sual ahcun thihbak ding..

Cu lio ahcun Alarm ah ka tarh mi ‪#‎Charlie_puth‬ nih a sak mi ‪#‎One_Call_Away‬ timi hla nih khingdimdiam te khin tho canglaw rian țuan kal a za tiin a ka țhangh.



oooooo000oooooooooooooooo