Ka Thiam Lomi Fahnak Petu

Kan khual tlawnnak vawlei ah lunglawmhnak timi hi chikhat zaanmang manh bantuk men a rak siko. Thinlung ruahnak nih zeitik hmanh ah ai tinh ballo mi le ai thim ballo mi a ruahawk zong a theih ballo mi, a cang cuahmah mi thil sining cohlan khawhnak ding caah in tuarkhawh nak le i lungsaknak ding caah ka tha zaang a dertuk rih.

Nikhat ah duhnak hi mei arh bang ai hlio i tiva bang a țhang tawn ko nain chikhat ah tikhu bang a ziam țhan tawn, cucu ka rak philh tawn hi a poi mi lak ah a poicem. Asi vawlei ah zeithil hmanh a hmun mi an um lo dawtnak hmanh a hmun kho lo asinain kan rak duhnak lungthin bel a hmun. zaankhat a aw thei ta loin ih cu ka caah chiatsarh mi zaan bang hnglihkho loin hliam mi sahrang bang kai lawng, ka tuartem. Cu tuartemnak cu a tuartem ve lomi ca ahcun kan Laiholh phunkhat lawngin hrilhfianh khawh dingah a har. Ka duh tuk ruangah a chiakha tuk mi hnachuahnak zong a ka ngeihter phah' cu ruangah duhnak hi sual phawt awk a tha hnga maw? Tha hlah e" Duhnak cu a mit acaw titeh sikha. Amit cawt lawng siloin a hna tiang a chet i duhnak hi a hrut an ti phah. Cuti a mit a cawt ruang le a hnacheh ruangah a ral zong achia hlei lo, țih mi a ngei hlei lo, ai ținh mi hmun ah phakkhawh ai zuam. A phakkhawh lotik ah a lung a donglo, theihthiamnak he hmainor ai zuam peng. Duhnak nak in dawtnak a biapi deuh an ti tawn nain kei nihcun, duhnak nih zeipaoh a huap khawh dih ka ti. Dawtnak cu țhithet he an tahchunh ah keinih cun lungvaar he ka tahchunh. Asi: a hmanthiam mi hna ca ahcun lungbang bangin a fek tak ko Asinain kei i ka rak comi duhnak bel cu duhnak deu(lungmot) a rak si diam. Ka nunnak caah cat loin ka dawp mii thli, zingzaan ka din ei mi ti rawlnak in a biapit deuh hi thei sehlaw hi tuarnak horkuang chungah chun,zaan, zing um peng dingin a ka siang hnga lo? Zeitik tiang dah tuarnak horkuang chung ah kai paih rih lai, aka chuah khotu leng an um lo a mah dah lo..a fek bik thinlung cafang in kan rak țial țimi tuanbia a donghnak cahmai ah maw nangle kei kan tian ko hnga? ka tuarnak hna cu cahmai pakhat cungah an țil lai nain zeitindah a dik thlir tein ka tialkhawh hnga? Ka tuarnak lila hmanh kai chimphuan khawh lohi santlaih lo cu si hnga maw? Ka hmailei lamthluan ah tuar in nak lawngte nih a tuammi cahmai kau in vunrel nolh lengmang dingah zeitin hme tuarzia cu ka thiam reng hnga?

Kham awk a tha lomi thil sining nih an kan țhen nain ruahchannak cu pakhat te hmanh a zor lo khah, asinain ruahchan mi ka rak sive lo caah kei ruahchannak hna cu rili cung a tla ruah fang menmen an rak si. dawtnak in ța thawng na rak kati keizong nih ka chuahpi kafar bantuk in kan ruah i kan dawt caah Far Dawt kan ti kha. Kei caah cun a thlumbik biafang an rak si nain atu ahcun a khabik sivaichia cawh mi dinzuu bantuk an si cang. Ța thawng kan țhen sianglo nangmah loin zeitin hi tluk a tawi mi kan khualtlawnnak vawlei caan ah hin ka nun khawh lai, kan țhen sianglo tiin mitthli he nolh cakip na rak nolh kha na philh hme maw? Na mitthli hna nai hnawh hnu na tha nai hrim hnu ka liang nai hngoh pah in Thawng kan tluntaak chung ko lai mu kan ram zong țhat lei a panh ko cang i ka baan tami ka sianginn kai ka va peh lai, Pathian nih lam a ka hruai i dam tein kakai khawh ahcun kumhnih kakai ah boih ka laa lai khitik ah na rak tlunglai i ka boihlaak tik ka pawngte ah na ka dirpi lai mu na rak ti kha- keizong nih sianginn kai cu kan duhpiak tuk vemi asi caah nangmah loin ka tleikhawh loding kai theih cuahmah ko buin kan el sianglo. Cuticun a fiang rih lomi thaizing kongah chunmang zaza kan rak manh i ai dawhbik mi chungkhar nuam zong kan rak serți, Asinain cu chunmang hna cu zaan mang hmanh a tluk lomi chunmang menmen an rak si diam. na peh rih" Thawng rak ka hngak pengmu na rak ti kha, Ziah kan hngah peng ko tung kan philh țunglo- na ka philh kun far dawt? Hmunkhat ah kan rak len ți caan ka kut i tlaih in ka liang cu na chantling ah hmangin, ka baan cu na tlaihtleng thabik ah na rak hman kha. Ka ha-khi na thak na ka ti zawn ka liang na ka tlawh tawn kha, philhding ah ka siang hrimhrim lo. Atu cu valdang țangcungah na lu thluk in na merem cang ko lai nain keicu kan philh lo Far Dawt.

Nangmah nakin ka duh i ka dawtmi nu hi vawlei ah an um lo cu voitam pi kan chimh cangbang a theithiam bik tu zong na si. Keizong nih ka duhbik mi na si cu tampi ruah hau loin zaangdam tein ka theih. Țhennak bia na phai ni in ka thinlung nih an duh mi lawng na silo kai fiang, ka nunnak thlarau hrim nih an duh mi na si hi atu ka nun nih sullam tampi he a theih. Chimko lo ah ka dam lo i kai nuam lotuk caan hmanh ah khin nangmah an nuamter khotu ding tuah cu kai zuam si. Na thawhka rel dingah an mirhter khotu ding biafang ser cu ka thiam lotuk buin na MS inbox ah ka rak send tawn . Cucu' nangmah nuamhnak an pe tu siloin keimah diriamh nak sawhsawh ah thluakfak in ka tuak i ka rak send mi siko rua. Hi hnu pinlei zongah duh mi cu ka hei ngei vete ko hnga asinain nangmah nak cun ka duh deuh lai tiah zumhkhawh nak thazaang ka ngei lo.

Kei kan dawtnak cu

Lungbang in a fek i a hmun.

  Nang na dawtnak bal

Chikhat nilin phengtu khuadawm bang

An lo i an țian.

A voikhatnak kan i ton nan inntang India restoren cabuai fate pakhat cungah hmaitonh in kan rak țhut kha na theih rih men lai. Na ka zoh kan mirh, kan zoh na ka mirh, Kan i zoh kan i mirh. A ha ai dawh lomi ahcun a mirh ai dawh bik na si kan ti ah khan na ning a rak zahtuk kha ka theih ko. Zeitluk in dah kan thin a tur ti zong kan mah pahnih nak a thei hlei an um lai lo. Cucu dawtnak a thawtnaam pakhat bantuk ah ka rak ruah. Kha lio ah khan cun hi bantuk țhennak bia a phai ngam ding hmanh in kan rak ruat lo nain theih ka duh lotuk mi țhennak bia na chim ko cu zeitin dah tuarzia cu ka thiam reng hnga. Lungthiang tein Coca Cola kan rak i cah veve kha--ka duh mi tirawl a theihthiam bik tu na si kan ti kha nai cinti maw? Kan i ngamhtlak deuh hnu hmunkhat ah kan lenți caan vanva bang tlengkhat ah țhu in duh bia kan rak phai ți nak țhutdan cu a hmun, kuttlaih in kan lenți nak zalam zong an hmun rih asinain kan dawp ți mi thli bang nangcu na liam diam cang. Hi hmun ah duh bia kan phaiți than lai tiin ruahchannak a pelte zong ka ngei lo nain mitthlam ah na mirh iang hna atu lelek ai khirh i kan ngai, kan hlam" . Zeitik ah kan dawp kho țhanti lai lo hi hmun thli thiang.

A ngaingai ti ko lo ah' dawtnak cuai kan rak thlai ti lio ah khan ho lei hmanh ah cuai lung nih a rak lerh hlei țunglo. Keimah nih kan dawt deuh kan ti hmanh ah na thin a rak hung, kan dawtnak na ka theihthiam piak ve lo tiin na rak ka unh, nuar hnawh. Nain a hnemh na rak fawituk ning kha mu, a hnemh zong na rak nuam. Ngaihnak kha kan rak huatuk, atu ngaihnak lila kha keicu ka ngaituk Far Dawt. Lungdai hnangam tein thinlung  in a tliangtuk mi cahmai cungah ai dawhtuk mi tuanbia țha kan tial tirua tiah kai ruah lio ah ka fian lomi sullam dang na rak ngeih ko cu zeitindah tuarzia cu ka thiam reng hnga mu. Messager voikhat leh hmanh ka tonti lo hnu, a kan pehtleih tertu Online(Feibuk) in block ka si hnu na caah thil rit ka si hi kai fiangtuk ko buah voitam pi cu philh dingin lungthleh nak ka ngei veko. Sihmanhseh philh kan timh sin an duhtu ka thinlung a rak nuar lengmang ve hi a poi ka ti tuk. Ziah! Duh tlin lo nak vawlei asi ka theih cuahmah ko bu ah tuarzia thiamnak pakhat tel kai lakkhawh lo. Pa ka silo maw tiin biakam nak kai tuah caan zong a tlawm ve hrim ti lo.

Kan dawtnak hmelchunh nak ca ah tiin ka hngawngcung na ka awih mi țhi zong an hmun rih. Ziah a rawk kho ding thil hmanh an rawh rih tunglo a rawk kho lo dingah kan rak ruah mi kan thinlung dawtnak bal khawi ah an si kun? Na ka duhtak si ahcun ni khatkhat ah nangcu ka ta na si lai i keicu nata ka site ko lai na ti kha. Ziah! Kan duhtuk ko tung na ka philh ne? Ka kal tak hlah mu na ti kha ziah na ka liam tak ne? Zeitik tiangkhi hme hliah a ngei lomi tuar in nak horkuang chungah hin kai paih rih lai. Caan hi sițha bik a si anti nain ka caah nangmah nak si țha an um țung lo.

Nanghe conak dingah Pathian sin thlacam cu keimah rianruah in kai ruah---Kuazing sinah ka hnakruh caah ka hal hmasa bik mi na si kan ti ah khan kei zong ka hal hmasa bik mi na sive  tiin fianghlang tein na rak chim kha. Kai rak ii lunghmuih tuk ta. Kha lio ah ka rak ruah bal lomi thil pakhat bal a rak um. Kan philh lai lo i ti hnu ah i philh a rak um theih fian hlan, dawtnak phen ah țhennak a um ti zong rak theih hlan, lawmhnak hi mitthli ah an cang tawn ti zong rak theih hlan ka nun duh a nunning. Ruat hmanh Khauzing sin kan hal na ka hal veko ah Khuazing nih samhrisih locun a kan um hnga maw? Khuazing minchar in na velhle na rak ka kheih kha Khuazing hna tal a tla hnga maw?.

Mitthep kar ka rak banh manh mi na iang, Cun" na dawtnak zong --atu ahcun a thlumbik na biafang hna kha hmațhing bak an thak i ka tuarthiam lomi fahnak petu ah an cang. Far Dawt' na ka duh khawh ti lo ruangah sualphawt kan tim lo. Vawlei phung a siko tiin cohlan zia ka thiam lotuk buin  ka rak cawng lai. Caan nih zeithil paoh a khupthal a leh khawh bantuk in caan sin ah kan philh vete ko hnga lo maw  tiin lungthawn nak i pe in ka vawlei khualtlawn lam karkhat hnu karkhat.

Caan nih ai tinh mi hmun sin a fuh. Nangle kei bal kan hmuitinh sin kan hla. Ai hngir lelek mi ka hmur nih cun in ngaithiam hmahseh law. A dik mi ka thinlung ruahnak nih ngeihthiam khawhnak dingah thazaang a ngei lo.. A dik lo mi ruahchannak na ka pek mi kong bal ah hrial na si cang.

A fak tiin zeitin

Chim in

Domh in

Muai in

Hramh awk țhat lo lungthin.

Zeitin kan hngalh i kan ton

Tlaichannak hri

A uai i an car 

A rop i an cat

Kan theih hlan khan rak philhdiam kan duh.

  oooooOOooooo