Lai Mino A Kan Țemțawn Tu

Kum Zabu 21 chungah vawleipi a țhancho ning hi mangtara in a țhangcho. Cutik ah țhancho timi hi hna lawngin theih a zati lo, lunglawng zongin hngalh a za pek fawn lo, mit nih a hmuh i kut nih a muru kha a tongh ve hrimhrim a herh. Mit lawng nih hmuh in kut nih a tuah țuan ve lo ahcun, rili cung ai vuan thing hnah men siko hnga. A tlik in a tli mi chanti luan chungah kan i paih veve hrim a herh. A lioh in ai lioh menmen mi kan si lo zong a biapi. Zeithli paoh hi a hman zia kan thiam a herh bantuk i chanti luan kan timi zong hi a dawi zia kan thiam ngaingai a herh ve.

Thilri Nih Kan Nun A Hrawh

Kut nih a tongh bal lomi, kan zaanmang hmanh ah kan manh bal lomi ,kan lungthlam hmanh in kan rak ruah lem lomi Computer, Kutput Phone le Social Media nih fak ngai in a hun kan den, kan lungthin ah hmunhma thuk ngai in a khuar. Phundang in chim ahcun kan nunnak ah a biapi bik bantuk ah a vun cang kan ti khawh. Cutik ah thliri ah buai hram kan vun thok. Fimnak a cawng lio mi kan nau le nih Motor Cycle, phone, computer cawk piak locun sianginn kai an i tim ti lo. Cu cawk piak ah le ca lei ah an lung um ti loin thliri lei ah an lung a lut hoi cang. Cazoh caan an i pe kho ti lo, Feibuk(Online)rumro ah an lung a tlu, zeithli paoh hi a hman zia le a tonghțham zia kan thiam a herh hau. Cu zong cu mi tampi nih kan hngalh ko nain a tuah dingah caan kan pe kho hoi lo. Sianginn kai mi caah cun phone dehnak in cazoh a țhat deuh cu kan lung nih cun a theihtuk nain phone țhiam ah kan lung a lut, thliri hi a hmanzia a thiam mi caah cun fimnak tiang a chuah pi i ai hlawk tuk. A sinain kan Lai mino ca ahcun kan țhachonak dawntu hrik phunkhat ah an cang. Laimi fimthiam nak lei in kan țumchuk nak hi kan ramchiat ruang lawng siloin thilri nih kan nun a hrawh, thilri nih kan lung a mawn khawhtuk ruang a si ve.

Kan Ruahnak A Bituk

Chan nih a kalpi aipet tiin hawi ngeih paoh ngeih kan duh, kan sining nih a tlinh lo tiang khin kan duh lung a fak, hawi tuah mi paoh tuah kan duh, hawi kal nak paoh ah kal ve kan duh, hawi tuah lomi bel tuah kan i tim lo kan ral a chia. Cuticun hawi hmuh paoh hmuh kan duh ve tik ah hawi hnu zul peng si kan i tim(hawi tuah mi paoh tuah kan duh ve cu hawi hnu zul peng si kan itim tinak siko) Mi sal si kha kan i thim kan ti khawh. Cucu kan ruahnak a bit tuk ruangah a si. Kan mah pumpak nih thluachuah i mah kutke tein țuah țuan kan i timh lotik ah mi ram dang pa/nu kutke kan to peng ko lai.

Caan Kan Upat Lo

Laimi hmurka in a chuak duh ngai mi bia pakhat" Laimi cu caan kan upat lo tuk" ti hi a si. Hi bia hi meeting tuahnak le mi pakhathnih i hngahnak tbk in a chuak chuak țheo tawn. Cu a chimtu pa/nu lila zong kha caan a rak upat hlei lo. A ruang cu, Laimi paoh nih chim peng mi bia asi caah mah bia a chimtu paoh hi caan a upat mi si hna sehlaw chim zong a hau ti hnga lo. Laimi cu kan hna a ngam, duhsah salam in țhutdir kan hmang. Rian a tuan mi pakhat nih nikhat chung kan rian caan kha kan upat lo" kan hna a ngam, duhsah salam in țhutdir kan hmang. A herh huaha lo ah rian kan tlai- rian kan tlai tikah hlawhfa man cik(tan) ding ai fiangtuk. Asinain khawzei maw lahkhah sang ngai bang fang li nga cik hnacu kan hrik tida hmanh a thak lo, zei ah kan rel lo. A ngaingai tiko lo ah riantuan mi kan si, phaisa kawl mi kan si tik ah kan rian tuan a caan chung asi ko mi ah lahkhah cik hi cu kan i thimbak ding silo a lak in phaisa kan hlonh he ai khat.A herh huaha lomi ah caan kan pek tuk. Caan hi sehkan pakhat hmanh a uk kho tu kan silo zong kan theih a hau.

DL Tuantuk Ngeih Nih Țhanchonak A Donh

Mino nih ngakchiatuk in DL ngeih a țhat lo hi keimah pumpak in kai fiang ngai. Dl kan ngeihtik ah  kan caan zeimawzat cu pek an hau, cu lawnghlah a chel caan ahcun a tlawmtam thu in  chawva zong a dih ve.  Khuaruahnak caan kan ngeih mi i a cheuchum kha kan DL sinah a um ti usihlaw elawk a țha hnga lo. Cutik ah kan țhanchonak ding lam kha hmual ngei ngai in kan tuaktan kho ti lo. Kan dl an si bantuk in zul dawi an hau, caan pek an hau, an duhnak tuahpiak an herh, an lungleih a hau, cu hna pawl cu caan a heu mi lawngte an si, MS tlangkhat leh hmanh khi carel pah cun a fawi lo cu mu. Caan zei maw zat kan pek mi Nu/Pa kha kan ca'h lungfahnak petu hna an si sual tawn. Zeihmanh hi chimh khawh an si lo bang kan nonal lio kan duhdawt mi hna zong he hin nikhat khat ahcun țhennak chunmui nih a phak tawn ve hna.  Asi khawh ahcun dirhmun fek ngeih hnu lawngah DL cu ngeih i Nupi zong hei țhit beh te. Pumhnih pumkhat ngaingai ai sirih lomi caah thanchonak cu a dawn ngai ngai ko.