HOTEL

Zaan

Daihnak in a king

Thintur thawng tiangkhin a khing    

A tur ka țangah i thlim in

Vawlei nih a zawi thawt nam.

A tlai zaan sin

Atak sa a nem cemnak ah tlau in

Sual thianghlim phawt ka si zong

Lunghmuih nak mit in a ka zoh.

Cuticun!

Ka it nak in thawh dingah ka takpum ka vun i samh. Ka chantling in ka lu khapkhat hrawng ka cawi ah khin Uceu tlawmpal in it rih ko timi aw he a ka kawih i ka chantling cungah ka lu a tla țhan. Ka țangcungah a kut a chuan. Cun' ka liang cungah a lu a chiah i a thawchuah nih ka hngawnghrawng fak ngai in a chem. Nunnak thazaang ngei lo lakin ni nih a linh mi pangpar bang uai hninghniang te khin ka hmaifang fek tein a zoh. A chel caan ah a fa țikțiak mi ka hnukpar fak ngai in a hmeh. 

 Nizaan i ai thuh mi a siampu rim hna cu ka caah a thawbik thaithawh bantuk an si, thawchuah taak sian dingin ai tuah lo. Kan ih nak sirlei ah ai chia mi cabuai fate cung i ai hung mi laptop ka ih hmun in ka hei kau. Joson Derulo nih asak mi hla Marry Me ding tein ka chuah. Asinain daidimdiam tein a um mi Kepong Hotel cu fak ngai in a tlerh. 

Cuticun' i chawn lem loin kan hla ngaih mi nih a kan thawt deuh rua lunglut ngai in hla cu kan ngai. Ka cakeh lei baan ka tlinh, ka caorh lei kut in a samfa hna duhsah tein ka muai piak. Ai țhangh phak asinain a mit au a piang, fiang ririai te khin a ka zoh.

"Dawt- nai țhanghțha maw?

"Ummm"  tha ko nain a faktuk

A fak a timi hi ruah hau lem loin kai fiang. Kai her in a mah lei ka hawih. Cun" ding tein a cal ah ka hnamh.

Jolie hi a umtu hoiher ah ngakchia zei thei lo te khin a lo, duh a nung. A pantuk lomi a hmur le a hatian an i rem. A țhia zikziak mi a baan cung a hmul tete hna an mah le an siarem nak cio ah an tlu. 

Hmunkhat kan um ți caan ah hin ha-thi thak in ka kut a tak cungah ka thlak sual theu. A hlei in a bop tuk lomi a biang hriim hi hramhram in ka merh piak tawn. Uceu na kut zaangtuk tiin voi zeizat dek a ka unh i hnoh hnawh cang. 

A sinain a ka unh caan zongah a hnemh a har lo. A uar ngai mi le ai thiam ngai mi Selena Gomez nih asak mi "Love You Like A Love Song" a awchuah ka thiam lo buin ka sakpiak ahcun keimah tu bengh kai huah tawn. Ka sin ahcun ai hnoh, a duh chungin i hnoh seh i hnoh hi duhdawtnak a thlum al tertu pakhat asi. Asinain Unau chungkhat hawikom sin ah i hnoh hi a uar lo, a ruahnak a pical thiltheih duhnak lungthin he carel a zuam minu pakhat asi. A chelcaan feibuk cahmai zongah ruah phu tete status tawi tial a hmang . Phone chung zongin ramchung ramleng a cang mi thil kong hi a ka ceih pi zuam. Keizong ka zuam ngai mi asi caah kathaw ngai in kan i ruah țheu.

A mah he kan i theih hnu in ka hngalh lomi thil tete kai chap. A hlei in music lei hi a uar mi asi caah hlasak thiam hna an konglam(tuanbia) hi a ka ruah i a ka chimh tawn. A nih i a uar micu Selena Gomez hi asi, a uarnak a ruang tampi lakah Laimi kan muisam a keng ati i a uar khun. A ka chawnh rua nai cikua cu Selena hla ngaih rumro nih a ka suai-☺

"Dawt' zeitin na tlamtling lai maw?

"Umm' a țha chom ko lai.

Asinain ka lawi ngamti lai lo Uceu, kanu lepa hrim nih an ka thah la, anfa chung hmanh in an ka chuah phah lai. Chikhat te an mah theih loin dawr ka kal hmanh ah chimh ta loin lengchuak hlah tiin an ka sik. Kan chimh lengmang ko kha" atu chun,zaan nangmah sinah caan ka hman hi an theih ko lai, mati ka ti tik ah nangmah he ūm ți an duh lo  ka ti duhnak siloin nu pakhat ka sinak limhang cu ka nulepa an si tikah keimah nih kai runven tluk tein an ka runven ve. Asinain hi thil a can ruangah sualphawt kan tim hrim lo keimah santlaih lo asi ko.

Zeitin a bia vunchar i leh awk kai herh. Asi kho lo a ti cuahmah ko nain ka rawt chih zong ka vun i fiang. Nizaan kha ka din mi a tam deuh caah si lai ticu tuzing ka muihmai, ka taksa, ka luki fah nih an ka theihter.

Ka nun ah biahalnak tampi a ra, Jolie hi ka duhtuk chikhat ca lawng siloin zungzal ca dingah ka duh minu asi. Ka duh bantuk tein biakam nak zong voi tlawm lo ka pek a ka pek ve. Keimah le keimah hi biahalnak kai tuah te lai timi hi a pelte zong ka ruah sual mi silo. Zeitindah bia ka khiah la, atu cu a nih zong kum19 minung lawng asi rih kei le

Kum 20 lawng ka si rih, kan dirhmun afek rih lo. 

Cu lawnghlah Jolie te hi an chungkhar in ramthumnak a lan dengding an si, tlik(zaam)pi ninglaw a nulepa nih an duh hrimhrim lai lo. Zeidang duh lo kha cu um rihseh, kum zeimawzet an i hngahhlang mi UN lei in an fanu um lo tikah regest an tong lai, fawi ah an i timhnak hmunhma an kal kho lai lo ti cu al awk țha loin a fiang. Cucaah an duhhrim lai lo.

 Keimah zong nih zaam(tlikpi)ti bantuk ka uar lotuk cu Jolie sin zongah ka rak chim bal,   hawikom hmai zongah fak piin ka doh mi asi. Chankhat kan chuah ah a thiang mi țhit umnak cu kan i timh cio ding asi.(mati ka titik ah zaam tlikpi khi ka doh duhnak bia). Chungkhat sahlawh lungtling tein țhit umnak tuah cu a tha i kan nih pahnih ca zongah thluachuah kutka ai ong deuh ving lai ticu ruahnak ah tenh lo awk țha lo.

Jolie ka zoh ah ka zaangfak, ka duhtuk minu lungretheituk in chiah ding cu ka nun nih a celh ve ruam lo.

Valawi ko timi bialehnak cu a tawituk nain cu biachimnak dingah thazaang ka ngei lo. A bia pakhat hmanh let loin fak ngai in ka reh hnu ah a hmur ah ka kiss i ka ihnak in ka tho. Kan pahnih ca in Coffee ka siam. A nih zong a tho i ihkhun tlangah a țhu," a orh lei el a keh lei vaang ah a khin, a kuthnih i ihkhun tlang ai doh i keimah lei a ka zoh.

"Uceu keicu tisa tlawmpal tein ka duh lai mu

" Umm--

"Tisa tlawmpal tein ka tuahpiak hnu ah a mah lei ah kakar ka hlan i Coffee hrai cu a kut ah ka chanh.

A cakeh lei kut in Coffee hrai  aa tlaih, a țhia zikziak mi a kut caang le a tlaih mi hrai ngiang an i remtuk. Cun a pumter mi a hmur in asa cukmak mi Coffee hrai cu a chem pain din tein a hrawh, a pantuk lomi a hmur le Coffee muici duh an nun a zual. A chem pah in voikhat a hrawh hnu ah a mirh zimziam mi mithmai he a ka zoh.

"Uceu, keimahnak in ka duh ning na thei deuh, na thiamtuk, Cun' kai lawmtuk fawn, keimah hmanh nih ma tluk hin kai tuah kho ballo,'' ati hnu ah. A ka zohnak mit tanglei ah a thlak i aa tlaih mi coffee cu din tein a hrawh țhan. 

Khing riangmang tein a ringmi kan hla ngaih mi zong a changchang tein ai thawn ziahmah. Kan ih nak Hotel thlalangaung puanzaar ka hei hlim i  kan khan chung hna cu sen dengdungin a cer mi nika nih fak ngai in le duh nung ngai khin a cerh. Cu hnu ah kai her i a țhutnak hmai cabuai i hngoh in ka dir. Cun a hmaifang thlah loin ka zoh. 

"Nai dawh hrimhrim ko Jolie, nangcu a rauh hlan ah  keimah he ai hlat biknak hmun, khi ramțha ah na va kalte lai. Cutik ah tahsa in zeitik dah tonnak caan kan hmuhkhawh țhanti lai, kan sian țung lo,'' a hmaifang fek tein ka zohpah khin ka lungthli in bia ka ruah. 

Anih zong a din mi Coffee a dih cang, a tlaih mi hrai cabuai cungah a chiah i a mah ring in a rak ring mi kan hlachuah mi thang ngai in a zul. Achel caan ah a kut khi a zulh mi hla hoih in a piah. Chikhat cu a lungretheihnak philh sehlaw ka lawhter.

A hla zulh mi a vun dih chawngah a kutcung nazi a zoh pahkhin.

"Uceu, zeitin na ruah lawiko naka ti maw, a tlai zong a tlai cang hi. 

A biahalnak nih ka khuaruah aka țhangh. Ka kut cung nazi ka vunzoh ve 3:00pm a ti cang. Atu nai hlah maw kan i țhangh(thawh) ko kan ti nain zeikar ah caan a tlik manh theih a rak silo. 

Atu tiangah a biahalnak fangkhat zong ka let kho lo. Keimah leikap cun zei paoh a tlamtling dih ko i cohlan dih kai zuam ko asinain an chungkhar kong ka ruah thil harsa tuk asi ka thei. 

UN hi um hlah sehlaw mu zeidang dawn khantu cu kan pah chih ko hnga. Ka khuaruah ka peh kho hlahlep lo. Hi btk biahalnak kai tuah te lai hi ka chim cang bang kai ruah lomi thil ssi tikah ka thluak ah pakhat hmanh kai rak i ken lo. Ka khuaruahnak hna cu Jolie biafang nih a vun țhangh. 

"Uceu, faktuk in ruat hlah mu, ka theihthiam ko. Atu hi kan chungkhar kongah na buaituk ti ka theih, kap hnih caah a țha in khua na ruah caah ka biahalnak na ka lehkhawh lo zong kai fiang ko. Asinain lung nuam loin um hlah mu. Ka valawi ko lai, a ka dawbik tu ka nulepa an si bang zeiti paoh in an ka tite ko lai. Asinain thaizing ahcun an dawtbik mi an fanu ka sițhan țhiam ko lai. Baibal nih ta  ''sual man cu thihnak'' asi ti kha, ka sual man cu ka in ko lai, nangmah lungrethei in na um ding kan siang lo.'' A țhutnak in a dir i ka kuthnih in ka hngawng ah a ka kuh, cun'' ka biangah ding tein a ka hnamh i a mirh. 

Keizong ka thaw ding tein ka chuah khawh deuh cang.  Nulepa nihcun fale kan sual rup in a kan lehrul ballo le an dawtbik mi kan sițhiam ko ti hi Jolie biafang in ka vun i fiang i thazaang ka la. 

"Uceu, pathum le cheu ti cang lai  i kholh usihlaw țin pah usih.'' A hnulei i ai țem mi a samtom ai phoih pah khin a bia apeh. Nai kholh hmasa lai maw keimah dah kai kholh hmasa lai.?

"Kan pahnih in i kholh ding siko hen cu'' biatak lo ngai khin ka capo.

"Kal, pahnih kholh cu kholhnak khan nih a kan tlum lai lo,  luțawl hna ka duh i a ro manh suallai lo, kai kholh hmasa lai mu. 

"Awkhe, kholh nuam!

Cuticun, an inntang tiang ka vathlah hnu ah keizong kan inn lei ah ka țin. Azaan ph ka hei chonh i na nulepa nih zeitin an in ti-ti ka hal. 

"An kut ngaingai cu ka tak cungah an thla sianglo nain an biacu lemh a har ngai ko. Nain lung nuam loin um hlah thaizing ahcun an dawtbik mi an fanu ka si țhiamțhiam ko lai, Arasaw ati i ding nawn tein ph chungin a mirh thawng theihkhawh asi.

Keizong nih 

"Dee'

ka ti i ka mirh ve.

OooooooooooooooO