Mitthli Phen Lawmhnak
Cuti cun zerhkhat ai dinh hnu ah an umnak in minit 30 hrawngkal asi mi restoren ah rian tuan hram a domh. Mi fanau a chaihma ve hrim, holh nih thiam lo rian nih thiam lo ai phua i a mawh hrim lo. Malay holh in khat,hnih,thum hmanh pahra tianglawng vun thiam cangah cun aa harh hringhran ko. Asinain vanthat ah a riantuannak ah laimi a tuan mi an um ve i ai ning deuh ngai. Cu hna nih cun an bawmh, an chimh i thlakhat a tuan ah hin cun fukfak in holh zong cu a ti kho deuh ve i rian zong cu a thiam tawk cu a thiam ve cang. An rian tuan ti hawi zong nih an dawt i boss te zong nih an dawt ngaingai.
Rian in a luh ka ah a rak daw i a herh mi um caan ah a rak bawm i a rak chim piak tawn tu Iangku hi Palian thinlung ah a um(caam) nain hawikom bantuk in an i kom, an um ti. Ka khatkhat kal an herh nak ah an i zul, bawmh an herhnak ah an i bawm. Iangku zongnih a chuah pi a ta bantuk in a ruah i a dawt, a tlaihchan ngai.
Cuti cun caan a liam sin in an i komhnak caan zong a sau ve ziahmah cangbang. An thinlung chungah hawikom lawng si ti loin i tlaihchannak pin ah a um rih mi dawtnak, dawtnak pin ah zeizongza a huap kho tu duh nak zong cu a um rih. An lungkil thli tein an i veng veve. Palian zongnih caan tha kawl in Iangku sin ah dawtnak biaphuan dingin timhtuah nak a ngei. Dawtku zongnih zeitik ah dah palian sin in dawtnak bia ka theih te lai ti lawng a hngak. An lungthli tein caan sin ah ruahchannak an chiah veve. Kan nih laimi hi pa nih duhnak biachim(phuan)lo ah cun nu nih va chimkhi cu duhtuk mi cung zongah chim ngam asi lo. Zei ruangah dah an chim ve lo tiah a ruang kawl zongah hmuhkhawh asi lo, kan laimi phung hrim ah kan ruah lo bia maw si hnga? Pathian nih a kan serlio hrim in pa nih chimphuan dingin khaukhih miko a lo. Iangku hi michuak thiam mipum rua thatuk cu asi lo nain an khua ah cun a mah an ti ve mi pakhat asi. Mi chonh biak a zong a thiam i umtu hoihar zong a thiam pin ah a fim hrim a fim. A mah le a pumral ven nak cu mirang holh zong hi phang lo asi.
Iangku te hi apa nih UNHCR ah benh dingin a auh mi hna an si caah an nih hi an lamtluan ahcun tukum chungah ramthum nak lei ah a lan(kal) kho ding an si.
Nikhat cu rian in an tin pah ah palian nih ruah lo nawn pi khin Iangku thaizing pathian ni cu MoVie zoh usih ca nai manh lai maw? tiah a vun hal," Iangku zong nih zeicu kha ti loin na ka dangh ding si tham ah zoh ding siko teh, a vun ti ve.
Cuti cun thaizing niceu dawh nih mirh bu le penh tein a vun donhna sin nizaan an biatiam bangin Palian le Iangku cu hawikom sin in an i zukphiak i movie zunglei ah cun kar hlanhram an thok. Movie zohnak an phak ah hin zat-tlan tha mi he an i ton lo caah "cat tun"(mui tawn) an zoh ti. Dawtmi he rak zoh ah hin cun Cat Tun movie znghi man a rak ngei ve hrim ko. Caan tha la in Palian nih iangku kut a vun tlaih i, iangku zongnih zei cu kha ti loin zalong tein tlaihnak nawl a pek ve. Cuti cun dawtnak in duhnak run innchung ah an i peih. Iangku zongnih palian liangcungah a duh tawkin a lu a thluk ngam cang. Palian thinlung khuaruah zong a zaang i iangku zongnih tthal ti kaang bang a hngak mi bia a vun theih tik ah lawmhnak in an khat veve.
Hmunkhat ah rian tuan tti an si tik ah zingzaan an i hmu an um ti. An i dawtnak zong nikhat hnu nikhat in a hmui chin lengmang. Chikhat te hmanh then ding an tih.
Palian hi nai te ah a phan mi asi bang CRC card lawng a ngei rih mi asi. Cu chinchap ah UNHCR nih mi an la ti hna lo ti asi hoi. Iangku te hi kal sual hna sehlaw an i ton a har cang lai. Iangku nih tukum chungah ramthum nak lei ah a lanh taak ding a fiang. Palian caah cun a hmailei ruahchannak thazaang a der ngai tawn.
Cuti cun tlaihawk a tha lomi caan hna cu nikhat hnu nikhat in an liam ziahmah. Iangku te hmaithla nili ah kal ni an thanh cang hna. Mahi ni bantuk hi midang caah cun nuamh(lawmh)nak ni asi nain palian le iangku caah cun ngeihchiatnak ni caan ah a cang. Hmanhseh an hmailei lamthluan ah ruahchannak a zaza an chiah ve ko. An nih i an i tinh ningah cun Iangku hi a kum a vun tlin in cun Palian hi a pasal ah banh(theh) te dingin an i ruahchan. Mati in ai um in ai la mi hi kan laimi chungin an tlawmti lo.
Voikhat cu iangku te kalnak ding ni 14 ai duh ah, Vawlei cung inn sangcem pathum nak a si mi KLCC ah an kal, a inn san lawnghlah a inn tang hmunhma pangpar dum ai dawhtuk mi hmanh hi zohphu tuk asi. Nungak tlangval ai duh daw mi hna ca ko ah hin zohphu le kal phu asi..Thingborh tang i toden an hun mi hei zoh ah khin a khuahkhuah in ai kup i ai rek mi le ai hnam(kiss) mi mit nih hmuhkhawh peng asi. Pangpar dumdawh chungah cun iangku le palian cu vanva bang tlengkhat ah thu in duhnak bia zaza an phai ti. Iangku nih ai thuh boih mi a rimhmui pawl hna cu zialmal tein a hrangmi thlizil he palian cu an i cuh, thlizil nih an lanhpi dih sual tiah thawchuah hmanh a ngangan phunkhin a um. Palian nih a bag chungin an mah pahnih caah a cawkmi thi a vun chuah pahkhin iangku na mit i chim a vun ti," palian nih a chim bang cun iangku cu a mit a vun i chimh. Khah au cang." A vun au i palian nih iangku kut cungah thi cu a vun chiah. Ka dawt iangku nangmah le keimah kan i dawtnak hmelchunhnak caah le kan i phlih lo nak dingah hihi kan tette siseh mu. Vawlei thil ri cu an rawk kho, carik an kai kho, a ziam kho mi an si ko, hmanhseh keinih kan dawtnak cu zeitik hmanh ah a rawk in a ziamkho lai lo a vun ti. Iangku mithmai nih ai lawmhnak mitthli in an phuan. Palian kai lawmtuk nangcu zeitik hmanh ah kan phlih lai lo ka nunnak ah ka thaw bantuk in a biapi mi na si ati pah in palian cu a vun kuh. Palian then lai a sian lonak kong cu ziahmah tein a Palian hna hram ah lungzur ngai in hitihin a chim-" Chikhat cu kan i then lai cu kan i thennak cu kan caah ruahchannak lam sialtu asi lai, ka hngak ko mu, na pawngah zungzal um peng ka duh ko. Nanghe chikhat i then ding ka ruah ah hin ka nun nih a celh ve hrim lo. Nangcu a ka theihthiam bik tu na si caah kan biatiam bang tuni thok in kei cu na nupi ka si cang, nangzong ka pasal na si ve. Chikhat kan i then kar ah zumhawk tlak tein ka nun(um) piak mu a ti pah in palian biangah a vun hnamh(kiss). An pahnih in lunghmuihnak in an khat. Palian nih a tangnem ah a vun pom. An hmailei lamthluan ah chun mang a zaza an manh ti. Miram dangah thinphan nak le lilen nak in a khat ko nain dawtmi he lenti ah hin cun kha te hna kha cu an te nau tuk. Ai kup i ai rek mi hna lak ah an nih pahnih zong an i tel ve. Ti le nga bang kuttlai in zalam dawh cungah ho vanhai loin an lengti. An i zul an i dawi ,an i pua. Vawlei nih nuamhnak a zawi mi vialte cu an tlinh dih. Cuti cun zaanlei ninem nih liam lai ai zal cang i an cuanh ti mi nelrawn pangpar dumdawh cu ninu nih a cheuchum te lawng a pen cang. Tin tak dingah an siang lo nain tlaih awk a tha lomi caan nih an thinlung cu an umnak hmun Kepong lei lawi dingin a fial hna. Ai dawhtuk mi tuanbia an tial hnu ah an umnak kepong lei ah cun kar hlanhram an vun thok..
Taxi an hlan i an umnak lei ah cun i lunghmuih nak mithmai he an vun choi ziahmah. Minit 20 hrawng an kal ahkhin police nih lam an rak kham (block) ai. Zeiti hmanh in hrial awk an that lo caah police pawl nih cun an mawtaw cu an vun dirter. An card (passpot) an vun hal hna i palian nih cun a CRC card te cu a chuah i a pek hna. Iangku tu cu card a ngei mi asi caah khat leikam ah an dirter. Palian belte police bokhat pah nih a baan ah thir cincik in a vun khih colh ai. Zeitin vuntuak tanawk an thei lo. Palian nih le a duhning in holh a thiam rih lo. Iangku nih kan bawm ko uh tiah a nawl len hna nain police pawl nih a thei hmanh an theipiak duh lo. Iangku cu a mitthli he police pawl hmai ahcun a dir i kan zaangfah ko uh a herh ah cun tangka zong kan i pek ko hna lai tiin a nawl len hna nain an zei hrik ti da hmanh a thak lo. Torh lo ah ka boy friend nan tlaih dingah cun keimah zong rak ka tlai lawlaw uh tiah raltha tein ati hna nain nangmah cu tlaih kan in duh mi an silo tiah an ti salam. Palian nih iangku he i then ding a ruah ah a celh ve hrim lo. Zei sualnak ngei lomi thonginn chung i thlak ko ding cu ruah ah hin thinlung a pit. Iangku nih palian a vun zoh i kata palian kan then kho lo nangmah sin ah ka ra ve ko lai ati pah in police mawtaw hram i a dir mi palian cu a vunkuh reh chih. Palian le iangku caah tuni cu vawlei a mui, ruahchannak an ngei mi cu zaanmang bangin ziamh ai tim cang. Palian nih a celh ve lo buin iangku cu lungcan pek ai zuam chih, ka dawt iangku tap ti hlah ngam cang keimah hmanh ka tah tunglo pathian sinah thla kan cam lai i a nungmi pathian nih cun tonthannak caan tha a ka serpiak hrimhrim lai na ngaihchia hlah tiah pacan cuh in a vun hnemh. Iangku cu a holh kho lo a mitthli nih a hmai an tuam. Palian zongnih a mitthli a thloh kho ve ti lo i a biang cungah dorkhat hnu dorkhat an vun tolh ziahmah ve. Aww.. ralzaam dir hmun hi cu a har hringhran ko dah mu! Ai duhdaw cukmak mi zong thlachiat ruat lo police nih tang zeizat reemruam hme an then cang hna hnga mu. Sualnak a ngei lo laimi malay thonginn ah hin lu zeizat nunnak dah a liam cang hnga? Kan kawlram chiatkhaat tuk ruangah zeital ka ningcang deuh hnga maw tiin Malaysia ram cu kan rak panh hna, zei hlei hlah( tha hnem kan kawl kan ti paam chin kan tong) Vun ruah ah lung a fak hringhran.
Hmaizarh zarh nolh iangku te ramthum nak lei ah ai thawh ding an si cang. Palian caah cun ruahnak hi a mui hringhran ko. An kal lai zongah an muite hmanh ai hmukho ding an si tilo, mifanau a celh ve hrimhrim lo i ngui-ngui thlak in a tap ve. Palian nih a mitthli he iangku rak ka phlih hlah mu, kan caah pathian nih a tha bik in khua a khan ko lai tiah pacan cuh in a chim mi bia nih atu an ton mi thil ah pakhat hmanh a bawm kho hna lo. Iangku cu kan i tongkho ti lai lo ti a ruah mi pakhat nih chikhat cu holh kho loin a tuah, zei si hmanh ah palian le iangku caah cun vawlei ah hin ruahchannak cu a tlawm hringhran ko. Tulio kawlram mi an tlaih mi hna cu UNHCR nih chuah an tim ti hna lo caah an mah le an umnak ram cio ah kuat an si. Iangku nih kata dam tein tonthannak um seh mu! Kan dawttuk nangmah nih ka par na tawh i nai tonh hlan lo kan hngah lai, vawlei hmanh hi rawk dih ko hmanhseh na caah ka par peng lai na lungdong hrim hlah tiin iangku nih palian tha a vun pek. Palian nih a bag chungin a cell phone a vun chuah i iangku cu a pek. Then siang loin an i kuhnak kut cu police pa nih a vun phoihpiak hna i cuti cun palian cu a duh na loin police pahnih nih a keh-orh in an tlaih i an mawtaw lei ah an hnuh chih. Palian a hnu lei ai her i a dawtmi iangku a tah lenlio a hmuh ko ah a celh ve hrim lo. Iangku nih palian ai cit mi mawtaw a liam hlan lo mitthep loin a zoh hna. A mawh ve hrim lo a dawttuk mi a mithmuh i thonginn lei ah an hruai thluah mah ko cu tuarthiam dingah a har hringhran.
Cuti cun zaan i hnglih loin a dawt palian kong a ruahnak ah a taksa nih a theih i a der, a taksa an rau. Palian zongcu thonginn chungin a dawt mi zuun ngaih in a nun lileng hringhran ve. Atu hi palian khawika thongah a tlak ti an hngal rih lo. Ton an duh zongah tonnak ding thong an hngalh lo caah an tongkho lo. A thawngpang zong theih asi lo. Iangku cu rawl ei chungpil loin a dawt palian zzun in a zaw, rian zong a tuan kho lo. ih hmun in a dawt palian nih a pekta mi phone chungi an photo tete le an message a zoh ko ah a thinlung hi maan dih aa zal.
"Zarhkhat hrawng a rauh ah palian nih iangku a pek tami phone cu a vun ring.
" Hello iangku maw?
Iangku nih palian aw a theih bakin palian na dam ko ti? Na thawngpang kan hlat lengmang i ta kan theihkhawh lo cu khawika thongah dah na um? Iangku mithmai ah chikhat cu lawmhnak ni a tlang. Palian nih a mitthli he iangku nan theih zongah zeisan a tlai ti lo, dam rak i zuam mu. Hmaizarh nithum nikhi kawlram lei ah an ka kuat lai atu hnu cu kan chawnkho ti hna lai lo nangmah nih kapu le te zongkha tha tein rak chim hna mu, lungthat loin um hrim hlah. Hmaizarh nithum nicu iangku te ramthumnak kal ding ni asi. Iangku cu a tah aw nih a bia an phih i a chim mi biafang an chuak kho lo. Palian na umnak thong cu ka chim ko a vun ti ah cun palian lei in phone an thah cang. A ruang cu thonginn chungin in sautuk i chawnhkhawh asi lo. Mangtha hmanh i cah manh loin an biaruah a dong! Atu an aw an i theih hi a donghnak asi kho. Iangku cu ih khun cungah ai let ai lawng a thiamchunh tahnak nih a tlinh lo tiangin a hram. Iangku te hmaizarh nithum ni ramthumnak an kal ni ah palian zong kawlram lei ah a kir ding asi. Cuti cun zing le zaan ni le caan a liam i iangku te kal ni le palian kawlram kir ni cu a vun phan. Cu zaan cu iangku nih palian muihmai thurh nawn pikhin a mangah a hmuh i palian cu a lu ai kongh i iangku nih palian tiin a vun auh bak ah khin iangku ai thang ai. Cuzaan cu hnglih kho loin a zaan an liam.
Iangku te chung tuni 2:00pm ah an chungkhat sahlawh rualchan hawikom hna he UN zung an phan. A dawtmi palian belte a bau, a mithmai hmuh ta loin kal dingcu a tih hringhran. Hawidang caah cun tuni bantuk hi an lungthli tum tlin ni, an i ngaihtuk mi caan asi nain. Iangku caah cun vawlei a muih ni ruahchannak a dongh ni ah a cang. UN zung hmai ah tlawmpal mi an hngah hna lio ah khin Palian UN zungchungin a vun chuah khi iangku nih a mitsir tein a hmuh. Iangku nih a thang ngai mi aw in Palian Palian ati pah in a zuan hnawh i kuh colh! A mang i a hmuh dankhan palian cu a lu ai kongh taktak. An pahnih in an i kup an i rek, lunglawmnak mitthli an mit in a biangcung ah a vun tolh ziahma. Iangku nulepa zong an i nuamhtuk nak ah an mitthli a luang ve.
"Palian ziah zeitin dah na chuah zia kawlram ah an ka kuat lai na ti lo maw?
Palian nih aw ka vantha tuzing 7:30 ah UN officcer nih a kan ton i a case aa chimkho mi poah cu a kan chuah, cun atu kha UNHCR card an ka pek bak in ka vun chuah asi, a biapeh ah Atu hi kal na i thawh maw asi? Iangku umtu zia a thiam lo a thilrit vialte cu palian a hmuh bakin khawika an tlau a hngal lo, a nun zalong. Um atu kal kan i thawh asi a ti pahkhin a biapeh ah Palian kan thlacamnak pathian nih a kan leh ti? Lunghmuih nak in a khat mi mithmai he a vun ti, a bia a peh rih hawi nih an ka chimkanh sual lai ti a phang mi ko a lo. Kan i tongkho canglai ti tuni cu kei ka kal lai, kakhin kan vun in lak lai i a rauhhlan ah na phan colh lai ati pahkhin a mirh. Palian zong a ha-ni a khumh khumh kho ve lo. Van ruah ti bang a tle mi mitthli pin ah lunglawmhnak a um. Iangku nu nih kafa palian iangku he nan chunmang pathian nih a thlinter canglai, atu a tangrih mi nan caan chungah zumh awk tlak tein um i zuam u mu a hmasa bik ah pathian phlih hlah u mu. Palian nih iangku nu bia a theihtik ah ai lawmtuk hringhran. Dam tein vungkal ko u mu kan caah pathian nih a tha in khua a khan cang ati pah in palian nih iangku a biangah a vun hnamh. Cuti cun lungduh in an i nuamh manh hlan ah thennak caan nih a phak than hna nain hi thennak caan an tan mi hi cu an caah ruahchannak lamsial tu tha asi cang.
A rauh hlan ah palian zong iangku sin a phan lai i innchungkhar khat an serti lai. An kut an i tlaih dih hnu! Dam tein an i ti hnu ah iangku te chung cu UN zunga chunglei ah an kut nih Bye-Bye a piah buin karkhat hnu karkhat an kar an hlan ziahmah.
Van Ruah Ti Bang A Tle Mi An Mit Thli Phen Ah, Lawmh Nak In A Khat Mi RuahChan Nak Thar A Um!•.
Comments
Post a Comment