A Caan Lo A Sur Mi Van Ruah

Tuzaan cu arfi an de lo
Khuadawn nih vawlei a chilh
Fingtlang zong tichum nih a zelh
Hraikhat hnu hraikhat nal ziahmah in a pil mi wesky 
Kuakkhu nih pawngkam a tuam
Ka ri lo nain ka thi lin!
Zuu hrai ah lungfahnak phuan a fawi khun an ti bang
Ka lungfahnak hna cu hi cahmai hin ziahmah tein luan hram an thok.



Chim ko ah cun Parte he hin kan i komhnak caan asau cangbang ka duhnak caan zong a tawi ve ti lo. Ka hngakchiat tein ka rak duh i ka rak ngiat, ka rak ven pengmi cu Parte lawng hi asi, Parte hi sayamah fa ai hngalhnak ah Caa a thiam, umtu hoihar  zong a thiam i kan sianginn khan chungah cun parte a uar lomi pa cu cite liak lo an si lai. Kan lungthli tein kan ngiat dih, culak ah keizong kai tel ve. Hnihring le angki rang ai hruk i a laitah zaal te ai bei ko ah hin khua nu khuapa lolam kal ai thawh mi hmanh nih parte chawnh ta lo cun an lo lam kal a tluanglo dingphun in an um. Sayamah te fale hi kan hngakchiat lio ah cun duhnak biachim cu chim lo. A chawnh hmanh kan rak chawn ngamtuk hna lo, a ruang cu an duh lo ningin kan ti sual hna ah cun an nu le sin ah phuan an hmang tawn.



Caan sin ah kan nih zong kan catang a vun kai ziahmah ve. Tukum cun tangriat a kai ding kan si canghna, kan khua ah tangriat sianginn kan ngeih mi cozah nih an kan chuh caah May thla dongh lei cun khuapi lei ah fimnak cawn ah pawh cio asi. Hawikom rual he hmunkip kakip ah kan i thenthek dih cio hna, a cheu Hakha le Kalay ah, Acheu ThangTlang ah cutin cun kan sianginn kai nak hmun ai dang cio nain Parte ka duhnak cu pakhat hmanh a zor in a danglo. Parte hi Kalay ah a kai. Kumcheu hrawng ka kai ah ka ril fonghlei a puang i sianginn kai kho loin kai din beh. Cuticun khua ah caan ka hmang. Parte ka duhnak hna hi cakuat in voi zeizat dik ka tial i voi zeizat dik ka suaksam than lengmang.  Asin a phanh ding taktak ka tih, a mah nih zei sawpa ah a rel lo ding ka ruah ah kai thlohthan lengmang tawn. Parte nih le Cathiam le mui dawh si, khi ka ah khin cun mifim le cathiam, muidawh nih an zelh lai i a lawngti lo sual lai ti ka ruah ko ah hin, ka thin hi meihma bang a lin tawn. Ka lungkil tein Pathian sin ah parte cu DL ngeihter rih sawhhlah keimah caah rak ka chiah piak ko tiah thlacamnak in ka hal tawn. 
+++++++++++



Tutan kharte an tlun ah hin caantha kawl in asin ah ka duhnak hna phuanlangh dingin timhtuahnak ka ngei. Parte te an tlungti thawngnih kan khua a cul, a mui ka hmu rih lo nain ka thin tur.  Ka ngaihtuk mi asi nain hmuh lai ka tih, kan inn thlalangawng in parte te inn lei ah ka mit nih fial hau loin a cuan. Tuzaan cu kai ngaih pah, ka tih pah, biachim ding tampi kai ciah cia! Ka thillak ah kai remcem ka timi kai hruk i ka ke nih parte te inn lei ah ho fial hau loin kar hlanhram a thok. An inn hmai ka phak le an inn hlei a tum ai tong celngel. Parte ka hmuh cu ka mithmai ai thleng, ka thintur zongai phundang. A muihmai a tungtai dehkhat hmanh ka thlau lo nain ka palh. Chawnh ka phlih(ka ngang) Parte ai dawhnak power nih ka nun a lauter. Ka chawnh hlan ah Ceupi kan ngaih ning na dam tawn ko tih? Aka ti pah in a kut a ka chanh i kan kut kan i tlai. Zeidang bia chim lem loin parte nai thlengtuk hi teh ka vun ti'. Kal ko Ceupi nangmah ko hi teh na mih ninghi- a vun ka chaih colh. Kai phuhrung hoi ka lungthli tein ka thil ngeihchunh te asi ka ti. 

    



Tuzaan cu an tappi hram ah kanmah pahnih te lawng kan thu. Bia zaza kan i ruah nain tuchun i kai ciah mi ka biapawl cu a chuah an chuakkho lo. Na sianginn kai na tlamtling maw ti cèo ka hal! Holh loin sau nawn kan thut hnu ah pacan cuh in  parte DL na ngei cang maw ka vun hal top. Ngei hlah! Ziah? Atu hi DL ngeih nai tim maw ka vunti hoi ai. Tim rih lo ka hngakchiatuk rih! Ziah Ceupi na biahal ai phundang ngai e? Keimah tu a ka hal lila. Keimah te hmanh ka biachim thiam lo he ka-kaa a phih. Torh lo ah- Parte DL ngeih nai timh lo cu keimah vanchiatnak ah asi rua. Kan hngakchiat lio tangli kan kai in atu tiangah nangmah lawnglawng ka duh mi nu nasi tiin kan duhnak hna cu fianghlang tein chimhkhawh kai zuam nain 'Kai Lawm' ti ceo lawng a ka leh. Parte a mah ve lo bang tuzaan cu a bia an thaw lo. Ai ruah lo tuk ningin bia ka chim caah maw si hnga? Ka chim mi bia nih dah a lungsuk i si hnga. Duhnak ah hngakchia upa ti um lopi tangriat cu DL ngeih an za ko cang. Na ka duh ve maw ti hal cu chim lo ka lawi lai ti hmanh ka chim ngam ti lo. Ka zun a chuaktuk nak ah ka paang a keh lo lawng. 


"Parte zaangfah tein rakka ruah piak ve mu"
Umm ti can ah a lu asuk.
Tuzaan parte bia nih ruahchannak pakhat tak hmanh an ka pe lo. A hlan nak in ruahchannak thazaang ka ngei mi an der. A ka duhkhawh nak dingah zeidah ka tuah lai ti ka hngal lo, keimah nih ka duh khawhnak dingah zeidah tuah hau, ka duh ko cuteh. Tuahser nak ti ah cun tuahser nak hi ka thiam mi zong silo pin ah ka sining zongnih a tlinh in ape fawn lo. Ka hmailei caah parte sin in kai ruahchan ngam mi a tlawm. Aphi hal ding zongah ka tha zaang a der. 



Tutan an kharte cu zaan chiar ka leng nain a phi cu ka hal lem ti lo. A ka pek lo ding zong fiangtuk in ka hngalh caah asi pah. Nikhat ni cu parte a sianginn kainak ah ai thawhthan ding asi caah kan khua hauka tiang ka va thlah ve. Thlahnak kut kan i tlaih hnu ah mangtha tuk mu Lungthat loin um hlah ati mi bia nih ka tha zaang tampi a ka pek. Ruahchannak zong a um ti kai fiang. Ziah hme a phi ka rak hal ko lo tiin keimah le keimah tu sual kai phaw.



Tuzaan cu parte hmaifang ka hlam. Hauka i Lungtha loin um hlah a ka timi bia nih zei suallam an put ka thei lo nain ka thinlungah fak piin rian a tuan. Ka hna thlam hna ah phlih awk tha loin a thang. Cucu zaan cu Zuun hlasa in kan khua zalam ka cul.
+++++++++++++++++



Ni le caan hna cu second pakhat nih tlaih awk tha loin a thlen khawh. Tukum x'mas cu kai ngaih lawlaw. Parte sin in a phi coding kai ruahchih, a donghnak ka biachah nak kai tuah zong asi. Parte sin in a phi ka cokhawh lo ah cun malay lei kal dingin timhtuah nak ka ngei. Tukum kan khua x'mas cu parte te nih an kan tuah piak lai caah ka thazong a tho khun. Mandatsak hrim cu keimah rian ruah in kai ruah, ka tan thatthat! Zaanlei sang ni liam vevang ah khin Parte le a sianginn kai ti hawi pathum he an inn hmai an vun phan. Tlangval pawl nih an capo, an hauh pah hna caah chawnhnak caan ka tinglo. 
 Mandatsak kan lim in kan inn cio ah kan tin hna. Kai kholhkhawh in thlalang hram ah sau ialte kai tuai hnu ah. Ka angki lum ka khup tiangdeng aphan mi kai hruk. Ka kedeng but a tlangsau mi ka tanpor tiangdeng a phan mi kai denh. Thlalang ka vun bih cu Korea pa cio tuphun khin ka sam hna ka vun milhtolh. Tu zaan cu ka caah ruahchannak a khah in a khah zaan, hi ruahchannak hi ai dil lai maw ai sat lai dah ti cu tuzaan Parte bia nih ri a khiah te lai. X'mas caan ah sak tawn mi hla (Vawlei lawmtuah Bawipa a tum)timi hla kan sak ko ah hin, vawlei ka phlih hlah maw ti awk in, kan thinlung a hliphlau cio. Kan raa a lawm, hi hla nih hin x'mas thawtnam tampi a zawi ka ti. Kei mino hla remhnak ah ka thut caah parte pawngthut ka caak tuk nain ka thu kho lo. A langhlat tuin ka mitsiar tein- ka ven. Pumhtin cun kawp ngeih nih an kawp cio he puanbu i zawh buin kan khua zalam an cul hna. Acheu khuapi le sianginn kai a tlungmi pawl len ah a phoihphoih in an vak hna. A cheu Parte te inn hmai changbel hngah pah in biasawng kan tlorh hna. Tuan ah lawi ding cun an i tuah ruam hna lo. Mit vun theh len dingah hngakchia cem nih vun thawl ding cu an hmaikhah asi fawn lo.  Cuti cun zaan zoang a tlai ziahmah sin pakhat hnu pakhat an i zuk phiak i an lawi dih hna.

     
Kanmah pahnih lawng changbel hram ah a kan chiah ta. A totum in a thu i a khup cungah a lu a chuan cutin meithing thu a tuai pah. Zeitin biahram domh dingcu ka lungnih a theihtuk nain ka-kaa in a chuak an chuakkho hlei lo. Ka dangah zeidek i tap sehlaw a khi bang. Kan mei toh mi ceu nih a vunceuh ko ah hin ai dawh a zual hma hlah maw ti awk in. A vun mirh i ai chuah pimi a hatian le a hmur an i remkhawh ning, aser tu khuazing ka thangthat tuk. December thlizil nih a sam hna an vun thui delhmalh ko ah hin ai dawh ning zei he hmanh tahchunh awk ah ka sianglo, vawlei nih ai dawhnak tahchunh dingah a zawi lo zong asi kho, Lasi an ti lengmang mi zonghi parte nak cun ai dawh lai ka zum lo. Parte ai dawhnak hna cu tampi ka chim ti lai lo. Parte a thei mi minung nih ai dawh ningtluk in ka chimkho tunglai lo i, an ka mawhchiat sual lai.  Cuti cun December thlizil he parte nih ai thuh mi a siampu rim hna cu kan i cuh. Duhtuk mi he meiphu pakhat vuntoh ti cu a nuam lawlaw, khuasik thla nih a chuah pi mi nuamhnak ah mei hram thut(meitoh) hi el awk tha loin ai tel hrim lai. 

       
Hmmmmm- Parte na ka ruahpiak kho cang maw?  Zawhte rawl haub in ka vun hauh. Holh loin sau nawn a um hnu ah Ceupi DL ngeih kai tim rih lo kan ti kha, ka hngakchia tuk rih, cun sianginn kai lio i DL ngeih cu asi kho lo. Parte duhnak ah hin hngakchia upa tiin ai sengtlai hme maw, duhnak cu nai chuapi mi asi ko lo maw? A lu a vun tun i a ka zoh, Ceupi ka ngeih mi duhnak hi a ho sin paoh ah chiah awh tha hnga maw, nangmah nih na ngeih mi duhnak khateh a ho sin paoh ah maw na chiah? Sianginn ka kai lio hna si hi rakka theihthiam piak ve ca. Nangzong hmaikum cun sianginn na pehthan lai lo maw? A aw a ro nawn," Um siko' hi kongah hin na ka duh lo nain ka duh ti cu ka hne ngam hrim lo. Kan duh na theihnak cu a sau cang ko lai, kei zongnih kan duh tuk cu kai theihnak kumpi kum nga asi cang. Fianghlang tein ka let kho law kai lawmh ko hnga parte? Na ka duh dawt caah kai lawm nain na biahal nak pakhat hmanh kan lat kho lo, kan duh le duh lo cu na theihte ko lai. 

Ka mitthli an tolh hnik nain ka thlohkhawh than, ka thawchuah le ka mithmai nih cunfiangtein an langhter khawh men lai. Ma tluk a kik mi zaan ah ka thlan hripi in a ka paih." Um si ko, kan duh na theih mi kha kei ka duh mi asi ko. Na ruahnak(na pom dan) hi kan uar pi tuk. Na ngeih mi duh dawtnak bantuk te kha ka ngeih ve ko. Minung pakhat na duh bantuk khin keizong nih ka nunnak pek dingtiang in an duh tu pakhat ka si ve. Duhnak pakhat lawng cun eibaar a chuakkho lo ti ka theih nain, ka ngeih mi duhnak hi mi pakhat sin khin, fawituk in laakkhawh asi lo caah, rak ka theithiam mu.

++++++++++
Tuzaan bantuk caan hna hi ruahchannak ah a pelte zong telh an rak si hrim lo. Kai ruahchan ning bantuk in thil asi tilo caah tuarzia thiam cu a har ko. (Dawtmi nih dawtu dawtnak a theih lo ah cun dawtu cu a tap tawn)an rak ti mi hi, a bia lawngin ka theih tawn nain atu cu mithmuh kut tongh in ka ton cang. Duhnak ruangah ka mitthli tlak a voikhat nak zong sisehlaw, a donghnak zong siseh tin keimah le keimah lung kai hnem.



Kanu le kapa malay kal ka hauhnak hna hi a sau cang nain Parte aw-ann ngai in kai chanpeng nak hi asi. Parte sin in ruahchannak an um ti lo hnu, thaizing kiptuh khi malay lei kal dingin ka chimh hna. Hi malay kal kai timh hi ho hmanh nih an thei rih lo, keimah ka chungkhat taktak lawg nih an theih rih. Pastor le khrihfa upa thlacam kan sawn hna ceo in zapi nih an theih hi asi, parte nih teh thei hnga maw? Tuzaan lei cu hawikom rual he thlahnak ah changreu dingin timhtuah nak kan ngei, Parte sawm lo cu ka lungthat lo caah keimah pumpak in ka va sawm. A rak theih lo caah asi men lai, a lau ngai mi mitzoh khin a ka zoh. Parte a nu nih Ceupi ruah lo piin malay kal i tim cu a vun ka ti. Aw kanu kai timhnak hi a sau cang i nan theih theu lai tiah kan chim hna lo. 

Parte nih Ceupi na sualtuk tuan te zongin na chim lo"
"Na theih ruah kan ti i ta kan chimh lo cu sorry si. 
Ka siangin kai hna vun dih sehlaw na kal te lai"
"Asi kho tilo parte thlacam zong kan sawm canghna
I letkhawh siko cuh
"Nangmah hna nih na ka thloh ah cun kai let tak sual lai".
I let ko Ceupi kan thloh ko.
Ka lungthli tein parte hi khua um hi a zuam zong ka zuam lem ti lo. Zohchunh awk tlak nu saltha si rak i zuam mu... kan changreu mi dih lei a panh ziah mah cang, chang kan reu chung a holh lem lo, khua fak piin ruat sehlaw a lo parte. Changreu kan ei pah in Cungpi nih Parte he hla i lat dingin re-khuat a vun tuah cu, kapi tar tiangnih a kut a bengh. Keitu cu Bil Sung nih a sak mi hla" Thaizing cun ka dawt kan tian canglai" timi ka sak.
Parte nih Molly AKuK sakmi" Siseh kei hi na ca'h ka tlai cangmu, kan duh lo ruang silo,ka phuan ngam lo ruangah far hi ka ngaithiam ko mu dawt mi.
 Kata kei hi na thazaang ka silo mw, ka caah cun ka thawnnak bik na si, ka thinlungah nanglawng hi na um ee. Ka thinlung hi hmu fianglaw ka palh sual mi vialte hna cu na ka ngeihthiam ko lai.

Hi hla hi zei ruangah a sak kai fianglo nain a nunnak dih lak in a sak ti cu ka hngalh.

 
Tuzing niceu dawh nih panh te le mirh buin a kan don nain, kei le ka inn chungkhar pawl belte mitthli he ka tho. Hi ni hi a donghnak kan inn ka lamh ni asi kho, Kanu le kapa, kan nau le, hawikom rual hna a donghnak ka hmuhnak hna asi kho. Minung nih thaizing kan konglam kan chim kho lo. Kan i tontik hmanh ah a tlawttlau kan um kho. Kapi saupi kan nunpi rih mu tiin ka mitthli hna cu dorkhat hnu dorkhat cerhti fim bang ka hmaiah an hun tolh ziahmah. Kan khua hauka tiang hawikom le chungkhat sahlawh rualchan nih an ka thlah, culak ah ka dawttuk mi parte zongai tel ve. Pakhat hnu pakhat kan kut kan vun i tlai hna, Parte zawn ka phanh cu Parte mitthli a biangnem cung in fim kikiai tein a hun luankhi ka hmuh. Dawhnak in a khat mi a iang,a mirhter mi a hmur nih a panh lomi a mithmai cu an thupkho ruam lo. Ka kut a ka tlaihhlan ah, a bek chungin thlitom palastic in ai fun mi a vun chuah i a ka pek. Phlih lo nak laksawng ah ati hnu ah kan kut kan i tlai. A ka thlah mi dawtu hawikom hna cu kir zai an rel i, kei le ka hawipa Kawikhar le kanu tu cu kan i tinh mi hmun lei ah kar hlan hram kan thok. Hnu lei her in a kan zoh mi Parte ka zoh ah a thar in ka mitthli hna tlak hram an thok. Tla ko seh parte caah a tla mi si cun a dih um ek zongin tla ko seh, ka thloh lo. Parte kut nih bye-bye a piah ruangmang. Cuticun a ka hringtu, a ka cawmtu semnak kan lungrawn cu karkhat hnu karkhat ka hlat ziahmah, tonthan caan  um hram seh tiin.



Mawtaw chungah Parte nih a ka pek mi bawm te cu ka phoh i ka zoh.     A chung i um mi cu Catlap pakhat chungah ca ai tial mi le kutdong hrolh pakhat ka hmuh. Ka hmuh ka ah cun ka lau, ka mang silo kai fiang, kai hrolh i kai za bak asi. Ka dawt parte ka thinlung na ka hneksak ruangah maw, hi thil kan ton. Catlap chung i ai tial mi ca cu ziahmah tein rel hram ka vun domh.

Dear,,

    A hmasa cem ah ngaithiam hal kan duh, na caah that hnemnak a ngei lomi nu ka si. Na lung ka fahter mi cungah a hlei in ngaithiam hal kan duh. Ceupi keimah ruangah malay na kal asi ko lo maw? Keimah ruangah nulepa um lonak hmun ah na kal ko cu ceupi ka ngaithiam ko mu. Ceupi chim ko ninglaw kei nih kai ruah ningah cun kharpi sianginn khar i ka vun tlun ah cun a phi cu pek te dingin kai ruah. Kan duh lo ruangah sihrim lo, nangcu kan hngakchiat tein ka mitsir thli tein kan ven pengmi nasi ve. Duhnak pakhat lawngin eibaar a chuakkho lo na ti ah khan ka lungthli tein kan dawttuk veko kan ti nain na rak hngal thiam lo. Voi tampi cu thinlung nuam loin kan tuah. Mitthli hi a semnak hi kan thinlungin a si i, kan mit in aput, na kal hnu cun ka caah mittli hi ka rawlthaw bik ah an cangko lai. Cu mitthli cu thinlung mitthli tiah leh ka duh. Thisen he ai dannak um hme maw? Na kal lai zaankhan kan duhnak hi kai fiangkhun, Ceupi na lung atawi tuk hi cu kei caah mitthli ah an cang. Malay na kal lai cu tuan tein ka chim law hi tluk hin ka mitthli hi an tla lai lo i ka tuarnak tel nem deuh hnga mu. Na sin ah ngaihthiam hal in kir nak nawl in hal hmanh ninglaw remhthan awk a tha tilo mi kan dir hmun nih a kanpe ti hnga lo. Atu cu kan umnak ai hlat tuk canglai. Nangmah na um lonak vawlei ah keimah lawng len ding ka ruah ah van hi a sang i vawlei hi a pih in apit. Na caah santlai lo nu nih na lung kan fahter tuk hi keimah le keimah kai hua. Na lamthluan ah thluachuah hmu mi na sinak hnga thlacam nak in kan bawmh zungzal lai mu. Na thinlung faktuk in kan hneksak ruangah rakka ngaithiam law theihthiam nak na ngeih mi chungin rak ka theithiam mu. Cun! Rak ka phlih hlah mu zungzal in hi hmun, hmun thianghlim in kan hngah lai.

  
                     Na lung an fahter i A Thli Tein An Duh Tuk Tu - Van Dawt Par



    Hi cakuat hi voi zeizat nak ka rel ka cinti lo, kumpi kumthum a luan cangmi Parte cakuat cu (A Caan Lo A Sur Mi Van Ruah) bang, kei caah fahnak petu ah an cang. Dap nih fawituk in a hrawhkhawh mi catlap cung i ai tial mi parte bia hna nih thawt namnak an ngei ti lo. A rak ka pek mi Kut Dong Hrolh an hmun rih. A rawkkho lo dingah ka rak ruah mi parte thinlung belte, valdang tang a pom cang ti thawng ka theih zaan ah hi cakuat hi ka rel than asi. Zuu hrai ah lungfahnak phuan a rak fawi taktak ko rua..



                                           Kualalumpur 2015/ 5/20 Zaanlei.