Laihla Hmailei Cuanhnak

Miphun pi pakhat kan si bantuk in bia le hla, caholh phuntling a ngei mi kan sive i a rum zong kan rum. Lai Zuun hla, Ram hla, Hloi hla kan ngeih hi 1933 kum ah Saya Kaw Kaw nih '' A HME RAM LAITLANG"  phuah hram a rak thok i cucu chanthar hla ah a hmasa bik phuah/sak mi asi. Cun' 1938 kum ah Pu Zo Mawng nih " A khin dahngai ngaknu leeng he kan lennak'' timi a phuak ve. Cun' 1951 kum ah Pu Za Neih Sum nih " Kan Laitlang i Cazir Mi U le Nau'' timi a phuah  ve. Hi hna pathum hi chanthar hla a phuah hmasabik an si. ////ref: Lai Nunphun, Stephen Ni Kio, cahmai 124/!//!

Ahme Ram Laitlang

Vawleipi ah hla hi a dotdot tein hmunhma an laak daan aa dang ziahmah. A luancia caan ahcun Country hla deuh nih hmunhma a laak i  atu chan ahcun  hiphop, rapper, pop hla pawl nih an vun naan ziahmah i vawleipi ah hmunhma an laakkanh ngai ngai cang. Mihlun deuh lawng nih Contry hla cu an ngeih(uar) cang kan ti khawh. Țhangthar mino lungthin ah hmunhma a la lo kho ti lo. Cucu youtube view zoh in theihkhawh ngai asi. 

Kan tlangtaar leiah kan i thawn ahcun, nihin  kan Laihla nih hin zeitik tiangdah Lai mino kan lungthin ah  hmunhma a laak khawh lai. Careltu pumpak cio nih kan hei phanh lai ding 2050 kum khi vun cuan hmanh usih. Khitik ah atu kan uar ngai mi hla pawl kan uar cawk ti lai maw, siloah an lo lai maw zeibantuk dirhmun ah dah an umte hnga,  kan fanau le a thawt kho te hna hnga maw. A luancia caan  chung kan hlasa hna an hla le aw kha a ngeih kan rakcim hna lo a caan le sining nih a rakpek ve i a thiambik le a țhabik ah rak ruah ansi ko. 

Asinain a tlik rangtuk mi chantiluan sinah a pil ve mi mino nih kan thinlungah hmunhma a la kho taktak ti lo. Kan thiamcia hla hmanh kha kan philh viahmah cang. A hlabia nihcun kan thinlung a tongh men ko hnga nain a cher ngai mi music aw le a hlakal um nih  mino nunah hmunhma a ngei kho hrimti lo. A hlun cang mi hla cu mihlun pawl lawng nih uar le ngeih asi cang.  Keimah pumpak chanchung hmanh ah hla fung zeizat remruam dek a duai manh hnga. Hla cu sining he aa tlak mi lawng kan uar tawn. Cubantuk cun sining zong nihin le thaizing a khupthal aa lat lengmang mi asi tik ah kan uar mi hla hi a zungzaal in uarcawk  khawh silo. Cer Hliang te Za Zi te an hla hna kha atu hmanh ah zeimawzat cu an lotlau cang ti usihlaw kan palh lai lo dah, youtube ah funghnihthum an pho mi lawng zapi hmuhkhawh dingin a um cang. A mah le caan liote ahcun kan Laimi nih rak uar bik mi le sakbik mi a rak siko. Sihmansehlaw chan nih a tlik taak cang i hnu a pil ziahmah cang. Cucaah mihlun kan pa le lawng a thawt cang hna, mino a kan thawt kho lo. Mihlun kanpa le chan ailim tik ah hi an hla pawl hi zeibantuk dirhmun ah dah an umte lai. Hmailei ah kilh kamh(tharchuah)tu țha a ngeih lo ahcun a lotlau te ko lai. 

Laimi hi hla sak thiam kan tam rup in Laihla nih a kan thawt lo ti usihlaw kan palh lai lo dah. Hiti ning tein asi cun kum 2050 ahcun atu kan Laihla tam deuh cu a tlau in an tlau lai i hmuh awk an um te lai lo. 

Kan Laihla  hmailei a dirhmun cuanh ah lungrethei asi ko. Phancop, sakcop hla a tam, a mizeikip nih hlaphel an i chuah, hihi ruah satmat ahcun makarkalak hui(a miak hmuh) duh men ah asi ti usihlaw kan palh lem hnga lo. A ruangcu an hla hi nihin ca lawngah an phuahsak, thaizing ah a duai colh ding, a lotlau colhding phun lawngte an si. 

Vawlei sining in hawi tuah kel tuah mi hi hmunhma an la ti lo. An laak hmanh ah  hmual an ngei lo. 2012 kum chuak PSY sakmi hla porpok (Gangnam Style) nih  vawleipi cu 

a rak hninh, youtute vawlei zohtu milu ah  kum li chung buan aco cang. Kum zeizat tiangdah a co rih lai ticu hngalh khawh silo. Fawi le bai ahcun an chilh khawh loding tu afiang. Amah lawng siloin Daimaou Kosaka zong (Pen pineapple Apple Pen) hla sullam ngei lo second 45 chungte lawng asi mi in vawleipi a hninh. Kan mah Chinmi chungin Thangpa zong nih design tharchuah in Kawlram chungah hmunhma a hungkhuar chin lengmang ve. Cutik ah hla porpok laarchan ah kan phan cang. Hawi tuah ballo mi design hi kanmah Chin mi chungzongin tharchuah usihlaw hmakhat teah vawleipi ah a laar kho cio kan siko. 

Vawleipi a rak hnintu Gangnam Style

Hihnu kum tlawmpal ahcun DJ zong kan Lai studio ah hmunhma a vun ngei colh lai, music ah nihin nak in thaizingah mithmuh kuttongh in kan țhangcho chin lengmang lai. Matik ah nihin kan Laihla tete ngeihawk le hlam awk kan theite lai lo. Kan fa nau le cu a thawt hrimhrim ti hna lai lo ti a piangko. Atu hmanh ah miphundang hla a tlaihchan deuh mi Lai mino kan tampi cang. Cucu, kan Laihla an/kan sunsak lo siloin kan music(studio) a chiattuk caah mino kan lungthin ah hmunhma a lakkhawh lo biatu asi. Biakinn chungah ZBC hla nak in worship song hmunhma a ngei deuh cang. Cu worship song hmanh ahcun Mirang le kawl deuh hi sak asi cang, kan Laihla in worklship song kan ngeih mi hnihkhat zong nih a kan thawt ti lo, miphundang hla kha tlaihchan deuh si cang. Hmailei  ahcun kan fa nau le nih  ZBC hla fungkhat hmanh thiam loin an chan an limte lai. Cucaah biaknak lei hruaitu nih pumhnak caan kan hman ah ZBC hla deuh in kan hruai hna sehlaw hmailei kan fanau le caah thilțha a chuahpi ko hnga. Silo hmanh ah, worship hla tel hi kan hlaphuah thiam hna nih kan Laihla tein tampi kan țialpiak hna sehlaw Mirang le Kawl hla banh hau lemti loin kan Laihla tein i hruai usihlaw țha deuh suamaau ko hnga. 

Kan Laihla ah zohtu milu tambik mi hla. Ring Zual

Donghnak ah:  hla hi a bia maw a biapi deuh awkal(music) tiah hlasak thiam an hal tawn hna ahkhin mitam deuh nih, an pahnih in an biapi veve tiah an lehțheo tawn. Cucu a hman mi zong si.

Atulio Lai mino chungah ah hmunhma a laa ngai mi Chokhlei Media Production pawl pumpak an sining a theih pah mi ka hawi pakhat  nih a ka chimhnak ah, Pumnak i solo sak cu chim hlah hla hmanh a hruai bal mi an silo, tiah a ka chimh. A chimnak ah orignal an aw hi cutluk pi țha cu sidawh ansi lo. (Hihi soisel sibak lo) Asinain music(computer) lei in  thiamnak sang an ngei. An muicawl tete zong zoh ah lungthin a zaang, khet an hmi. Music tuammuai an thiam pinah aw tuahto an thiam. Cutik ah kan Lai mino lungthin ah hmunhma a la bik an siko. Hi bantuk hi hmailei zongah hmunhma a la lengmang ding an si cang. Aw nak in hla umkal, tuahto, music, hlabia, hi a biapi deuh an site lai. Awțha le hlasak thiam hi an i dang. Atu vawleipi ah awțhat nak in hlasak thiam hmunhma an la deuh cang. Chantiluan hoih in a kal lomi thilri poah cu mino lungthin ah hmunhma an laak lo bantuk in hla zong chan sinah a tli ve mi lawng chantiluan mino nih uar caan kan phan cang. Cucaah, atu kan Laihla dirhmun fek ngei lopawl hi cu kum zeimawzat ahcun an lo tlaute ko lai.