12:00-PM Sin_Ah

Zingdang kelte bang a rit ngai tawn mi kalu le a buar pimpem mi ka muihmai he ka ihnak in ka tho, 12:00PM si cang. 

A tlai ko cang.... zingdang cu sisehlaw ngaihnak caan hmanh ngei loin rian ah kai zii diam cang hnga, nain tuni cu kai dinh-day kelte si, cu hmanh ahcun nangmah ngaihnak bak in caan hman kai tim, cun'' kan tlaihnak kut zong ka dorh cang lai tuni in. 

Mei pek cia in ka chiah peng mi video  volume tam ngai in ka hei play .  A fak ngai mi luki he ka chuah mi Lay Phyu hla  (Lay Lwint Lu)   ngaih pah in ka phone ka tuai. Ka thawhka i ka phone chungah a rak lut tawn mi.

"Na thoțha maw? 

"Mangthawte he rak thote mu,

"na caah nisunglawi sihram seh, 

"Kan dawttuk'' 

Timi biafang cu ka thawhhlan ah a rak tho tawn mi Nunu sinin  tuzing bantuk ah hmuh ding an um ti lo. 

Ka thawhphak kuakzuk pah in thlalangaung hram ah khua ka cuan.  Thlalangaung in a hei lang mi hmunhma tete khi zoh ah keimah bang a lilengin a um hartuk miko an lo,'' a kingtuk. Malaysia nilin tangah uai hninghniang tein thlizil nih a thui hiahmah  mi thingkung ko khi  a zuam lotuk mi ka lawhter.

 A cungah pithlung va hna nih zaihla an sak maw si, dawtzuun an thlem dah si ticu ka thei lo nain capo saih pah in biasawng tlorh hna sehlaw ka lawhter hna. Thinkung cu nilin tangah zuam lotuk in i thuiko hmanh sehlaw vanva hna caah ngaidem a pek i, rikhiah ngei loin futnak nawl a pek hna. 

Khat leiral inn cungah a khuahkhuah tein a țhu mi Laileng nupa tete nun ko khi hngar an vun um. Tiko lo, na caah ngai a tla lotuk mi nunnak pakhatnak cun a nung ballo mi rak si hmanh ka duhdeuh caan a tlawm lo. Thilri pakhat men sizong ka duh caan zong a tampi. 

Hlabia fang tete sin

Kan hlawinak Biazai hna an țim hlan

Thennak biafang an so a rak pawt kha.

Nunu

i hlaat hi țihtuk ko buah 

ngamh a rak hauhtawn hi

Zeidah vawlei hi a hmuitinh si

Nang na hmuitinh teh?

Nai lungsi ko lo maw?

Diriam tein na ka tuarter hi

Ka tluknak bual a kautuk sual hnga.

A hlan ahkhan cun zaan  hnglih lai na thawhphak relding tiin an mirhter khotu ding cakuat send ta loin kai rak i hnglih ballo. A tucu ka Cakuat zong na don lonak sau ve cang lai. Na thawhka na phone na zoh sinah na rel tawn mi ka Cakuat hna kha na vun ngai in na hlam tawn ve hnga maw. Keicu  dai tein nunnak caan hmanawk a țhat ti lonak hmun ah  na Cakuat  tlangkhat nih thazaang țhawnnak a ka pek i ka vawlei ah nuamhnak cii an rak vorh tawn. Nain a tu cu dawpding thli a um lonak khur chungah a tla mi ko khi ka lo cang. Hawi le hna a hartuk, thinlungah ai neih bik mi he mising dirhmun in i hlaat hi a hartuk.

Kan ngaihnak nih zuuhrai banh

țah nih zaan nih tam aa phua

Zeitin ka nun hi ka thlim lai?

Kan rak manh mi chun-mang pawl zong caan sinah kan phan lai, zeitindah keimah lawng cun ka ton ngamte hnga mu.

Hlan ahcun tiva bang hmunkhat ah luangți dingin saduh kan rak that, biakamnak zong kan rak ngei nain atu ahcun kan luannak tikuar ai dang cang.  Atu ai dang mi kan lam hi parațhen pakhat bantuk men hei sisehlaw tiva thluan pakhat ah i tongțhan usih ti ka duhtuk hringhran dah. Ai thoknak le a donghnak hliah khawh lomi thlizil sinah  kan biakamnak hna cu an i țhek dih cang. Thinlungah thlet mi siloin these lak ti thlet ko a rak hluan ai. Atu cu thilzil hna sinko ah kan ngaihnak a fak khun, ka theih mi tiva luan thawng hna sinah a thar in  thinlung ah na luangtawn.

A hlan thil sining hna cu caan nih liampi ko hmanhseh, tuanbia nih a ken camcin ko lai.  Zarhpini zingka ah ka rak don tawnmi nai pumhnak thilhruk tete le fak ngaiin na au mi a pum ririai mi na mitfang hna he Selfie na rak hmeh tawnmi hmanthlak ka don lonak zong zarh tampi a kal cang. A zaang didiai mi na hmaifang, a țhia zikziak mi na tai le nai fenh mi thawi an rak i rem tuk. Ai dawhtuk mi hatian sinah na mirhter mi na hmur ko nih mitthlam viarte a chak an rengh rih ko. 

Nain, a tu cu kan i hlaat, kan i theih hlannak khan kan i hlaat deuh cang. Zarhpi nizing na thilhruk le hmanthlak, zingka thawhphak i cakuat na send nak ai dang cang lai.  Khi hmun ah na hmanthlak tete le ai hnoh ngai mi na annthlum hna nih hmunhma an lak cang ding ruah zawn ah kan siang lo lung a pem.

A nih cu khi țangah a mirh

Keibal zuhrai tu kai sirh.

Keicu, thlahnak kut hmanh tlaita loin na ka kaltak cang. Hi hmun hin biaro vuih ding kan ngei lo kan duhnak hi i kalpi ko mu, kan tlaihchannak hi thluachuah an phurtu ah cangko seh mu. Kei bel, hi harsatnak lak ah chun-mang ngei lo'n ka kal cang lai. Keicu, a him lotuk nak Malaysia ah tuarnak zongza i phurh in ka vai cang lai. 

Nunu nai theih loin kan ngai, kai theih bu zongin kan hlam ko.  Atu cu lamdang na pial cang, na ka thlah cang, keizong hnu lei her in lamdang zulh ding lawng aiba cang lai. Mangtha mu ti ding hmanh hi nawl hartuk aikaw, caaan le thil sining nih bia an chim ai cang. 

Cutin

__Kanngaihnak hna nih an hmuhkhawh lo zaan a phante lai.__

.