Sihpi

Ka ihnak ihkhun hram ah a ril mi ka dinbang tithawl le changreu bawm tete, ka rel bang Cauk le a dih cia ka zuuthawl hna, mitțhep kar ah ka banh mi rose nih nan nih he thlahtlam in a ka tiamter hoi ko.  Molh-meh nak dinh hmun pawngah chunmang chiahru i bei in sawn lengmang kai huai, nun a rit, a ba, a ha, mifapa ciocio.  Ka hmuhkhawh hmual  zalaam bite sinah ah hlingle so, fahnak sepsaw tete na thawngpang sinah an i phua. A chelcaan cun zuhrai he i tiam zong a nuam in ka thei cang.  Fawi tein kan philh lai, voikhat  kiss bal mi na silo. Kan hlaat rih lai, ka tlaih bal mi kut na silo. Tuzaan  nun cu muihnak he i tiam phot ko hnaseh thaizing sinah ah an cinken tu thluak, an ruat pengtu thinlung in na mincu  mitthlam in kai khrih ngamti lonak tuksabur thlan-hmun ah ka vui lai.  Vawlei ah a um tilo bantuk zongin kan ruah lai, kan ngaiti lailo, kan theiti lailo, a um ti lo bang vawlei ah. Midang thladem i na zuan dingzong kan u...

Zingdang kelte bang a rit ngai tawn mi kalu le a buar pimpem mi ka muihmai he ka ihnak in ka tho, 12:00PM si cang.  A tlai ko cang.... zingdang cu sisehlaw ngaihnak caan hmanh ngei loin rian ah kai zii diam cang hnga, nain tuni cu kai dinh-day kelte si, cu hmanh ahcun nangmah ngaihnak bak in caan hman kai tim, cun'' kan tlaihnak kut zong ka dorh cang lai tuni in.  Mei pek cia in ka chiah peng mi video  volume tam ngai in ka hei play .  A fak ngai mi luki he ka chuah mi Lay Phyu hla  (Lay Lwint Lu)   ngaih pah in ka phone ka tuai. Ka thawhka i ka phone chungah a rak lut tawn mi. "Na thoțha maw?  "Mangthawte he rak thote mu, "na caah nisunglawi sihram seh,  "Kan dawttuk''  Timi biafang cu ka thawhhlan ah a rak tho tawn mi Nunu sinin  tuzing bantuk ah hmuh ding an um ti lo.  Ka thawhphak kuakzuk pah in thlalangaung hram ah khua ka cuan.  Thlalangaung in a hei lang mi hmunhma tete khi zoh ah keimah bang ...