Zeitik Tiang Dah Na Ka Hlaat Lai

Ngaihnak hi khoika in dah ai thok i hram asih ti cu a rawk ngai cang mi, a rawk cuahmah rih dingmi thluak zong nih fiang ngai in ai cin rih ko. Ai cin lan rih ko lai.  Ngaihnak hi zeitluk in dah hmual a ngeih i a huham ngan ticu Zawltling le Nganbawm tuanbia nih an zawirih ko. Nunnak tiang a la kho mi ngaihnak thlankhur hin na ka chuah kho hngin lo maw?

I duh cang hnu ah i hlaattuk hi zeidah na rak ka duh i kan duh, zeidah kan ruah i kan i duh. Vawlei ah tuanbia kan cinglo, kuttlai in voikhat lam a lengți bal zong kan silo, voikhat te na hmur kiss nak dingah hlatuk na per lengmang ahcun zeidah duhdawtnak i a muru cu sikun. Na caah ka hmur hi a thlum-mi tizu pakhat btk asi kho ko dahkaw. 

Vawlei ser asi ka ahkhan ngaihnak hi sermi Adam le Evi nihcun um harphen bantuk men ah dah an rak i celh hnga, ''asiloah'' zei bantuk biafang in dah dawtnak par an rak tlanhți hnga. An nihcu ngaihnak caan an ngei lo i an pe lo. Pangpar dumdawh pakhat chungah thaw pakhat i hrawm in pangpar caah dum cawngtu ralkap țha an rak si. Kan nih pahnih zong dawtnak ral hruangkamh tu ralkap țha kan sikho ve lo maw. Evi bang rulpi biahleng ai zumhtu na sisual hnga maw? Asi ahcun Adam caah thihnak na caah zongah thihnak. Kan pahnih caah thihnak,'' rulpi  mirh tinak''.

Kan i hlaat, na ka hlaat, hi chung vialte ngaihnak thonginn ah na ka thlak. A ngaingai ti ahcun ngaihnak hi ai țhen mi hna ca lawngah dahkaw ser a rak si. Ziah kan țhen țung lo na ka țhen ve țunglo na ka hlaat. 

Caan an liamtik ah dawtu pakhat el kai tlinh suallai maw. Midang pakhat hmurka țha an co suallai maw. Kan duhnak hi a dong suallai maw,''siloah'' ka lungthin hi mi pakhat nih an fir sual hnga maw. Atu cu dum ngeitu nih zoh duh loin a kaltak mi thlaikheu pakhat bantuk men ka siko. A ngeitu um lomi thlaikheu cu a fir fawite. Minung pakhat thisa in a tlawtmi duhcuainak hna ka thinlung nih an thlohtuk tawn dahkaw nangmah caah tiin. 

Ni an liam lai caan an kal lai hlaat pengmi ka va sirih ding, ka chunmang fa tete zong hlaatmi sinak sinah fang zeizat dah an țil cang. A umti lo tluk in ka thlapahle lawngin ka dir, a maw dih cang mi ruahchannak ah nangcu na fiang ko. Hi bu ah na hla pengrih lai maw, na hla peng kho lai maw? neihnak vialte in kan neih ahkhan phanhkhawh lodingin na rak hla. 

Kan duh na ka tinak cahmai kha zuk bang suai in na hmai ah dir in movie bang vun zohlaw edit mi si na hei ti hnga dah. Cu lawng silo, ka hlaat hlah kan hlaat kho lo nati mi cafang khateh nai bih mi thlalangah taar sisehlaw huatnak lila dah ka hmai ah khat țhup chak ka hei si hnga. Hi vialte thil sining hi Evi le Rulpi nun nih a kan cawnpiak ko.  Evi cu rulpi caah diriam tertu, Rulpi zong Evi caah mitau tertu. Cuti si ahcun Adam cu  ningzak in a tlamtling lonak taklawng asi kha fiangtuk in ai hmu, Evi pakhat ruangah. 

Kan Sianglo

Ka thlah hlah

-Kan thlah kho lo.

Ka hlaat hlah

-Kan hlaat kho lo.

Ka hlaw hlah

-Kan hlaw kho lo.

Diriam tein tuar rih ko ning

rim dang cu rakkai hngin hlah

hi fingreicah tiang.