Țhen Lai Zaan

A voikhatnak kan hmuh asi bantuk in a voihnihnak zong hmuh lengmang kan duh rih lai'' 

A thir pah mi aw he  ka hmaifang thlah loin a zoh. Apeh rih-kan ngaituk te lai, kan ngaih zaan hna an tamtuk tikah biafang nih a tlinh lomi mithli he kai tiamte tik, khi tik ah zeitin ka nun hi kai hnemhte lai?

A dai, a kik i a king

Din tein a ring mi music awhno tang  ah-

"Na pawngah kan umpi penglai' chikhat țhen nak nih dawtnak a fehter lai, i tlaihchannak a  zawitu an si lai ka zumh. A rau lai lo, ka țangcu na chantling țhabik asi lai, Cun' na mang sertu si ka duh.

A thawchuah thawng nih ka hngawng hrawng fak ngai in an hriah.

"A sikho lo ka pawng na um bu hmanh in tah kan ngaih cang hi, khi hmun ah nithongkhat renglo caan na va hman rih ding. Second pakhat hmanh țhen kan sian țung lo''

-a biachim a dih i  a dai ve, faktuk loin ka hmaifang a zoh.

Merry'' Dawtnak um ahcun ka hnangam, zeidah țihding um? dawtnak nih tuar in zia zong a thiam a herh. Tuni kan ca lawng a ruat dingah kan Upa tuk cang, silo ma? Kan no lioah kan chanchung ca i a herh mi  pawcawmnak  ca timhtuah nak biatak tein kan ngeih a herh, tihi na theihtuk veko silo maw?

A thaw fak piin a chuak hnu ah duhsah tein ai her i thlalangaung lei ah a kar a hlan, thlalang aungzaar hna cu pakhat hnu pakhat a hawh hna. Cun'' kan hmai i a dir mi inn sangpi a zoh i tlawmpal holh loin a daih hnu ah- a bia a domh.

"Phone in kan i chawnh caan, video in kan i zoh caan zongah ma tluk tiangin țhen kai herh lai  tiah kai rak ruat lo.

Atu, chikhat kan i tonnak nih țhennak a sersiam țhan ding ka ruah ah, ka tlei loding kai fiang. Asinain zeithil paoh ka cohlan lai, a tak nun in dawtnak thawtnam kan teh cang hnu ah a hlan bang muihmuh in i chawnh luala nih khan nuamhnak a kanpe kho ti hnga maw Salai''?

Hi zawn ah Salai a hman nak nih a biachim ai biatak ti a langhter. A hnu lei in thlalangaung ah a kut ai țhoh i keimah lei a hawih. Cun' a poih deng cangmi a samtom a phoih lawlaw i a thar in ai țem.

A chim duhnak sullam kai fiang, a tak nun in dawtnak zalam zawhți cang hnu ah mui hmuh i chawnh luala diriamh ti loding. Zeitin a lung vun nawlnak  ding biafang ka thluak ah kai rak i ken lo. Kai ruahnak ah fawi tein kan i thlah kho te ko lai tiah kai rak ruah. 

Thil sining ruangah kumpi kumthum ai țhen chung ding tu kan si. Ton caan a tawi i țhen caan a sau rih lai ding a mah chim lo keimah hmanh tuar kai herhtuk cia.  A ruahnak a pical ngai nain ka hmai ah ai hnoh ngai mi Merry ka zoh ah van in a rak tla i Khuazing thluachuah a hlei in a tingco mi a lo. Din tein a mirh caan ah ai dawh, lunghmuih ngai in a nih caan ah ai dawh chinchin. Khuazing kutzung a remtuk mi a hmaifang, a hatian in a hmur tiang kumpi kumthun  țhen chungding ka sian lotuk kai fiang.

Tuzaan lawng caan kan ngei, thaizing 9:00Am cun ka dawtmi um nak khuapi cu a chuahtaak țhan ding ka si. Tuzaan bantuk ah hin zeibantuk in dah caan kan hman lai, i sian lonak sawhsawh in caan hman dingah a pamtuk lo maw? Na lung i hrim, zei kan tuah lai a donghnak zaan kan caan ah.

 Ka țangcung ah a bok, zeibantuk bia kan i ruah hmanh ah kan i tonka bang kan hmai ah lawmhnak ni a tlang lo. Kan caah thaizing hi um hlah sehlaw tuzaan lawng si peng seh ti kan duh. Ka vuai lo, a hmui mi a samthuh rim hnimh.

Duhsah tein a sam ka muai piak pahkhin.

"Na hmai i phiah law inntang ah coffee ding usih, ''ding tein ka chim.

A ih nak in a kut a ka chanh i --ka thawh'' a ti. Ka thawh hnu ah, kholhnak khan tiang ka pua a ka ti țhan. Ka țhu i ka keng  cungah a bok.

Cun'' kholhnak khan tiang ka puak.

U Cung'' tuzaan hi na ka puak a donghnak si suallai ka phang.''

"A hramthok lawng sirih a donghnak si kho lo''

"Silo- keicu hmunkhat kan um ți taktak tik zongah puak kan hauh lengmang lai- a bia hlei vuangah, kan i um tik na ngeihlak tuk cia maw? 

Ka keng cungah a bawh pah khin a lu a vunsawh i ka hmaifang a zoh, a ka kuh nak kut a rengh deuh.

"Na duh tham ah na nulepa hmai zongah kan puak lai si.

"Silo'' a tlawmtuk, nan khua in Thantlang tiang na ka puak lai'' haaa- thang ngai in kan ni.

A hmai aa phiah khawh in a thil ai thlen. A pan ngai mi sapawsiat angki ai hruk, a sam a hnu leiah kuttum tia in ai beo. A lum pah mi pawngbi sau aa hruk hnu ah thlalang hmai ah tlawmpal aa tuai i inntang Coffee dawr ah kan țum.

A tlai ngai cang nain kan riahnak HOTEL tang coffee dawr cu mileng an rak ngei ngai rih, kan mah bantuk ai hngilh kho lomi ansi cio țheo lai.

"U Cung, dawr ah țhu loin bungus usih law lamlen pah in din ding si.

"Awkhe-

Bungus Palastic dur cu kut khat veve in kan i tlaih i muici phuntling nih a thuam mi meiceu tangah duhsah tein kan kar kan hlan.

A nuam ko, zei tluk a tlai cangmi zaan zong ah dawtmi he um ți ahcun khoika hmun, khoika vawlei paoh a nuam ko.

A cakeh lei kut in coffee hrai ai put, Cuticun ka cakeh lei baan a orh lei kut in ai tlaih i kan zalam len cu zaantlai sinah kan peh viahmah.

U Cung'' thaizing ai țhen ding kan si hi i philhter ka duhtuk nain philh nak nih ka lungthin ah hmunhma an la kho lo.

na kal hnu ka thaizing vialte khi zeitin hme caan ka hmante lai'''!? Ka liang cungah a lu a thluk i din tein a chim.

" Nangmah ca lawngah a har lo ee Merry keimah zong nih țhen lai ka zenhtuk ve ko. Asinain, kan nih pahnih caah a fiang mi ruahchannak kan ngei. Cucu zungzaal in ka nupi na si lai.

A kutlum te hum buin ka si khawh chungin thazaang pek kai zuam nain țhennak caan taktak  a phak tik ah kei mah lila hmanh kai rak fimtawl kho lo.