Adong rih lomi tuanbia

Hello''
Thawng² Aa na si lo ma? Nai uah ko'' timi auhnak aw nih ka hnulei a ka herter.

Aw-ah nawn khin

"Aw siko'' ai theicia biaruah khin kai uah cu na theih le maw? Ka vun tongh ve.

"Silo chawnh ruam na hman lo ruangah uah ah ka hei chiah ko.
"Nangmah lawng maw na vunkai?
"Aw si, keimah lawng.

A ka chawnh dan ah hawikom țhingbang ngamhtlak ngai in a ka chawnh, keizong nih aa thei bal mi chawnh in chawnh kai zuam nain ka rak thei naisai lo. Kan fiang deuh lo ee tiin vun halding ah kai chuahsual lai i uah lam seikurang khat kai phurh hoi lai ti ka phang . Aa theituk mi chawnh in a ka chawnh caah a mahnak thei deuh mi lawhding in.

"Maka hin maw na um? tiah ka hal.
"Aw si, malay ka phakka in ka hin ka um i atu tiang ka um ko hih. A bia hlei vuangah
"philh taktak in na kan philh ko canghih, hika- ka um zong kan rak chimh ko cang nain na ka vun hal nolh.'' Ador ngai mi mit au in a ka zoh pahkhin- a bia apeh.

"Nangta Kepong ahcun maw na um pengko'' tiah a ka hal cu ka ka lau bantuk.

Ziah a ka theih ngaitak țung keimah vial nih ka theih țunglo tiin ka theihkhawhnak dingah thluaksur in ka vun i tuak len nain ka fiang hlei lo. Ho nih ka umnak cu an chimh tiah ka hal deng.  Ziah'' ka theih bal mi minungah hi bantuk mi chuakthiam an um țunglo. Aaaa_ ka theitak lo hi, a poi lai ning. Immm.  Hi tluk tungtai țha le muidawh nih ai theicia chawnh in a ka chawnh lioah keimah i kan vun fiangdeuh lo ti dingcu ka sianglo lawlaw. Malay na phaknak hna sau cang maw tiah halding te zong asi nain Malay hna ah ai thei mi si usihlaw, kai phisin cawk loding ka theih i kai thlohțhan.

A tuhi lamton asi caah kan dir buin bia kan i ruah, asiarem deuh lo caah si men lai, ke in minit pathum hrawngkal asi nak India Restoren khi a kutdong in a ka sawhpiak.

"Ka khin țhu rih usih ca, na puaisin hna ciattuk maw, hmuh lonak zong asau i bia hna kan i ruah lai cu, tiah panh tein a ka chawnh.

"Aw siko, ka puaisin cu a ciat siloin ka caan cu long ngai ko'' nih pahkhin ka hei leh.
    --Kal, Vapual nawl nai cawn a ka ti i dinh tein a ka mirh pahkhin a dai mi a mitau in a ka zoh.
"Kal usih
a ti i India dawr lei ahcun kankar kan hlan.

Țhutnak ding todan kan vun i dawh pah i kan țhut vial ahkhin
"Atu hi nupi hna na ngei cang maw ngei lo hme? Gtalk chan kan i chawnhnak lawngkhan a si i thawngpang theih a har.

Ka ngeihrih loding thei in ka hal hramhram sehlaw a lo, a ka haldan zoh ah ai biatak  lo ngai ti a lang.

Gtalk hna cu a ruahtonh awk zong ka hngalh ti lomi a thar in ka vunthei. Duhsah in Gtalk i ka rak chat(chawnh) bal mi an profile, an min tete mitthlam in ka vunsuai  iahmah hna, aw... Iangku009@gmail.com kha si maw__aih silo, ka vun i tuakțhan. Awww__ ka theih Lovelypar@gmail.com tiin a Gtalk min asi kai fiang. Aw, ka rak theihtuk mi, a min taktak ah Ngunku asi. Caankhat lioah a rak ka duh baltu zong asi. Atu ahcun Korea(tuluk) nu van hngai loin a taksa a rang, duh a nung i ai dawh. Keimah malay ka phanhka teah a rak phan ve ti ka theih i an khua mi sinin a Gmail ka rak ngeihkhawh, Gtalk chungzongin caan zeimawzat kan rakhmang ți nain ruah lotuk ah Gtalk chuahtak in  feibuk chan ah rangtuk in kan tlik tik ah kan MS țhing tete hna cu hmuhawk hmanh an umti lo, kha lio ka rak hman mi Gmail zong zeitin asi ka philh cang.


A mah theih loding in nai dawhtuk i tah, kan palh cu Ngunku tiah bia ka ruah. A nih zong nih  biaruah ding tampi  ka ngei sehlaw a lo.

"Thawng, tuzing tuan ah na rak phan cang siko maw?
"Aw si,
" 99 hmai i na kal lio ahkhan jee(bazaar) kakai lio si i kan hmuhko nain kan chawn ngam lo kai palh suallai ka phang. Ati hnu ah a bia apeh rih.
"Na mui hrim hi a ngakchia deuh, a fawinak cun na țhangchotuk i kan palhbak ko lo ma'' a nih pahkhin a chim.

Kei nih caanțha i laak in.
"Kan nihte hna cu na kan philh cang hencu''

Ka chimpah in ka thlingza. "Ui fir ai phuhrung'' ti bakkhi ka si ko. A nih tu nih phisin nak bialam a kawl.

"Dai rih hmanh Thawng,
Kan philh khawh lo ruangah dahkaw kan chawnh cu in philh ninglaw atu hi kan chawn hnga lo si,, i lungsi ngai in bia a chimko ah hin a pumcu aidi le iangin a khat, a hoiher zoh ah hathi a thak, duh a nung. Caankhat lioah khan keimah te hna zeitinhme  kan duh a rak ka ti khawh hnga ka khuaruah leitu a har. Caan nih thil sining hi tamtuk a tlen i minung kan ruahnak lawng siloin kan taksa, kan muihmai tiangkhin tampi caan sinah ai thleng ticu pawngkam thil sining nih a nichiar in a chim lengmang ko.

Asinain Laitlang kan dirhmun cio ah khan cun nulepa hi takvun nah/ngo kan rak i dangtuk rua lo. Maka bal hincun nucu Aircon tangah nichiar rianțuan hnakaw an taksa hi Laifa khum an lo, lo. Ramdang elzim ngo hna lak zongah vun i chawr ve awk in an um cang, a cheukhat nu le bang cu kan taksa ngo(rang) mi an kan hmu lai lo ti a phang miko an lo, rianțuan nak zongah hniphur tawcor tiangdeng a langmi hruk an hmang, angki ah țangaan(hnuk) te lawng a hup mi an i hruk ngam cang. Lai le liang hrawnghraang cu papawl mitthit nak dingah an langhter hramhram miko a lo  asiloah ka pawlangh tehna cu a biapi lo an ti caah maw si hnga hngalh hlah. Laitlang anpu le nih vunhmu ve hna sehlaw ka fanu khi hmun ah taktalawng um maw na țuan anti men hna lai.D...Falam holh vun i hlan ahcun Laimi kan cem.

Asinain Ngunku cu hi bantuk thil hruk a uar lai lo ticu a umtu hoiher le tuni i ka hmuhnak thilthuam in a lang. Angki lehpiat pante a nak mi ai hruk i a zin ngai mi bawngbi nak ai hruk. Asam zong a nak muici nih a thah ngai mi lakah a sen-eu muici hngaltuk loin ai tuah. A taksa he ai rem, muici ah a nak ka duh ruang siloin a muihmai a tungtai nih ka duh mi muici an charcawi kan ti khawh.

Minit panga hrawng kan țhut ah kan i cah mi Apple juice le carrot juice a vun phan. Cu din pah cun kan biaruah kan domh țhan.

"Thawng' tulio na řian hna tlamtling ko lo maw, Restoren cu maw na țuan pengko?

Gtalk in kan rak i chimh mi tete ka rian le ka umnak a philh rih lo ti a piang.

"Aw si, restoren peng ka țuan ko hih,
"Nt zei rian deuh hme na tlaih cang?

Ka biahal a ka leh hlan ah na boss dom cang lai hih'' mirhpah khin a chim.
"keizong dawr hngah peng siko.
A bia apeh''
Kawikhar le Pa Biak hnakha nan thawngpang nan i thei kho pah tawn maw, khoika tile tlang dah an phak ve cang? ngaih an um ngai a vunti vial ah 2012 thok ka Farrawn khua kan tuanbia thinlung ah fak ngai in a vunthar.
A nih cu i theihter hlah sehlaw a lo. Kan tuanbia ah hin Kawikhar le Pa Biak an um lo ahcun tlam a tling lo ngai ding phun. Farrawn khua Lingmaw, ciantaka, kan tlunnak hna an innthlang memu kung tiangkhin mitthlam le thinlungah an vunthar iahmah.

Thinlung nih a ruahtonh awk a theihti lomi tuanbia cahmai ah phiat khawhti loding cahang in tuanbia țial nolh awk a țhati hnga maw? Aw.... mi philh ka hman hi atu lawngah fak ngai in ka vun i fiang. Zaan ih lai ah na kong ruah loin zaanzeizat reemruam dah ka rak daih.  Ngunku na lungnawl ninglaw lungrep ngei lo val tiin kutchuh dah na ka tuh hnga? Na ka siang lai maw, a maw fukfak mi thlapa toi lungdonh cung kan řak țhut lio bang na thinlung cu kan hninkho ti hnga maw. Na caah ka sunglawi ti lai maw?

A ni in nithong renglo a liam cang, a kum in kumpi  kumli a kal cangmi kan tuanbia cu hi ti hin asi.

II

Ngunku he hin voikhat te lawng ai hmu bal mi kan si. Cu hmanh cu Malay ka rat lai TABC Civui Farrawn kan kal lio ah kan tlunnak inn ai  rak i khat. Khualtlung kan sitik ah rawlei caan lawng bak ah tlun inn ka rak hlam caah a nikhatnak kan caam tiang ah hin  kan i chawn bal hna lo, ka hawi le pahnih he kan rak zah hna, rawl ei koko hmanh pasal pipi ningzah ruangah kan i fit dom. Pa Biak hoi hnacu chun a rawlțamtuk tawn caah a phaisa ronh mi  ni hnihnak kan caam ah a einak  vial cang.

Hi lio caan hi khuasik a dih i khualum ai thok lei sinain Farrawn khua cu a rak kik ngaingai rih, Hakha khuasik cio siko.  Ti zong an rak har ngai i Khuapi dum anti mi pawng tikhur ah kan rak i kholh tawn.  Akik, ti a har kan ti nain khualtlung mileng zohkhenh an rak thiam,  an mah hmanh nih an i thonh sian lomi an puan lakah a țhabik thim in khualtlung an rak kan hlanh, atu tiang kan tlunnak inn le an muihmai panh tete kha an fiang ngaingai rih, zeitik ah tonțhan caan um hramseh!  Mitkuh thaw tein Farrawn khua nulepa nih an rak kan thlim. Kha lio ahkhan kan duh lunghmanh in  lawmhnak bia kan rakchim kho lo.

Cuticun kan intek he zong kan vun i ngamhtlak i Ngunku te he zong kan vun i ngamh tlak ngaingai cang. Voikhat zaanlei cu Ngunku nih kan lakah Upacem a simi Pa Biak cu rawl einak thla  kan caampiak tiah a vun fial. Pabiak zong nih civui ra mi teh kan si cu tiah el-ah nak um loin cam hram mati hin a von domh.

""Bawipa nangmah nih tuchun kan caan hmannak ah lam na kan hruai i kan i lawmh'' har ngai in a chim hnu ah a pehkho ti lo. Cuvial ah kan hawipa kawikhar nih- a nih phuhlut ai rak thloh ko, ka nih awchuak ve suallai tiphan ah rianrang in ka lei kai seh in ka hmur kai huh. Cuticun a vun i awh-ah luklak i Amen, apek. Kan mit kan vun au cu thangngai cun kan ni ngam hna lo nain kan hmur cun dingtein kan mirh dih hna. Vanțhat ah rawl ei lai ah hin cun an ningzak suallai tiah inntek nih lengah a kan chuahtak tawn. Inntek rak um hna sehlaw  hi bantuk khual le khual lo a kan ti hnga. Pabiak bal mit au nak te a thei lo.

Kan eikhawh hnu  centre lei kan kal cu lampi thluangthluan Kawikhar nih Pa Biak thlacam a cawn i kan nihnak ah kan thi deng. Pa Biak hi mițha mi daidam asi ko nain hi bantuk soi hi cu huatuk kaw bawtol minung ati i  lampi tluangtluan an i dawi, an i tlai, an i dai__a rak nuam ve hrim.

Cuticun, caan zeimawzat kan hman hnu ah a donghnak zaanlei rawl ei ah tlun inn kan hlam țhan, hi civui chungah ka thinlung a ka la bik micu thawngțha a kan chimtu Rev le Pastor zong an silo. Kan rak i hmuhka tein ka thinlung£a la cemtu cu Ngunku hi a rak si. Thaizing cun Ngunku te he kan khua cio ah kir in ai țhen cangding kan si, zeitik ah kan i hmuhțhan te lai ticu ruahnak ah ai tet ngaingai ko. I țhen dinghi ka siang hrimhrim hna lo ka sian lo bantuk tein Ngungku te zongnih hin kan siang ve hna hlah sehlaw ka lawhter, nain caan nih thaizing cun a kan țhen cangding a fiang.

Ngunku rawlei nak kheng a țawl pah ah khin biachim ding ka ngeih caah phokhlet ah ka heichuak ve, țihdok ngamhdok in Ngunku tuzaan cu țian lai zaan siko caah kan mah pahnih te lawng hi kan tlunnak innpin lungdonh ah khin tonnak caan na ka pekho hnga maw? Tiah ka vun hal.

""Aw, Thawng'' zeiko dah toncu na ka herh ee, Upa te hna nih lengchuah a kan sanh ko ahcun i tonkhawh siko. Aka ti hnu ah lungawțawm ngai in __innchung lei ah ka luhtak.

Tuzaan țian lai zaan hi pumh a saukhun mi a lo. Cu pinah  laksawng peknak um rih hoikaw hngaktu kei ka caah a rak har hringhran. Farrawn nih cun Tlangpi pumh zong asau pi chih anti hoi hnga asautuk nak ah😃

Zei asi khom ah laksawng peknak a dih cun thluachuah peknak hlasak i lawi cio asi ko. Țian lai zaan asi bang mi zei khua hmanh lengchuah a ngah i centre kip ah nungak lenkhawh asi. Keizong nih caanțha i lak in zawhte sapherh fir lai bang Ngunku pawngkam rumro ah kai hel.

Cuticun a thli tein hawi sin kan i zukphiak hnu ah lungdonh lei ahcun duhsah tein kan kar hlan kan rak peh. Hi caan hi țhal lio asi caah van a thiang i thlapa le arfi nih Farrawn khua  cu an iang in an  tuam. Farrawn khuacung thlapa le arfi dawh ka hmuh a donghnak zaan asi. Tlangkam in meithang a pikpak tete in a zaam mi khi thlapa ceu toi ah maw nawn in hmuhkhawh an si.  Lampi thluangthluan cat loin bia kan i ruah i Zeikarlak ah tlangpi lamkam  lungdonh kan phanhmanh theih a rak silo.

Kan phanh hnu ceo in khualei kan konglam kan i hal mi tete cu kan vun baan.

Ka thintur zong ka khuaruah sinah tut...tut..tut in a vun rang ve. Tuzaan i Ngunku ka duhnak ka chimh lo ahcun hmailei tonțhannak caan sersiam a har ding si caah.

Thintur bu le țihphannak zeimawzat he  pa cancuh in.

Ngunku tuzaan hi hmun theng i rat kan sawmnak a ruanghi nai fiangtuk men ko lai. Nangcu kan hmuh voikhat in kan duh mi na si. Mati ka ti tikah zumh loin na ka um suallai ka phang. Duhnak cu a mit acaw anti hi atu  voikhat nangmah kan hmuhnak in ka ton ve mi thil pakhat asi. Kan duhnak hi hmunkhat ka umți caan zeimawzat chungah ka mitau hoiher in nai fiang ngai men ko lai dah, atu ka dirhmun na theih ko caah zaangfah tein rak ka ruahpiak law kai lawm ko hnga.!

Saunawn holh loin a um hnu ah,  a thawchuah thawng he duhsah tein van a vuncau i ka hmaifang fek tein a zoh.

"Thawng, tuzaan ah hin in let hmanh ninglaw kan caah zeisandah tlai hnga, thaizing in kan i țhenko lai cuta. Caanțha dang hna hngak usihlaw țha lo maw? ati hnu ah a lu aa khun i vawlei ding tein a zoh than.

""Imm Ngunku

"Na chim micu a hman thaizing cu pumsa in kan i țhen tak ko lai nain tuzaan i biațha na ka lehkhawh ahcun hmailei tonnak caan cu a mah tein ai sersiam ko lai. Zeitindah na ruah Ngunku, kan i tongțhan lai  tuzaan lawnghi tonnak caan asi lo dahkaw, na ka duh ve ko ahcun vawlei hi kan nih pahnih caah a kauh țung hnga lo.'''' Nal ziahmah in ka duhnak hna cu ka rakchimh, nain ka khat hmanh a rak ka let lo.

A mah lei deuh ah kai thawn i a cakeh lei kut duhsah tein ka humpiak. Cuhnu ah kan mah pahnih lawng theih dingin ''Ngunku  biahalnak kan tuah mi ah bialeh awk nai herhtuk sual maw siloah bialeh awk dah  na ka ngei lo maw si? Na ka duhkhawh lo ahcun hi vial intah kan duhnak tuanbia cu dongh ko ne lai tiin a cakeh lei kut ka hum mi fak deuh in ka reh, cu hnu ah a caorh leikut lum  in ka humnak kut fek tein a vuntlaih ve.

A panhtuk mi  muihmai he a ka zoh hnu ah.

"Thawng,, hi zaankhat ca men ah kan duhtuk ve ko timi biachim tuzaan ah kai tim lo, asinain  zungzal ca dingah ah kan duh timi bia in leh kan duh, cuti leh cu na duh lai maw?  A dai ngai mi mit au he a mirhpah.

""Ka duh lo inti ninglaw zeitin na ka leh kun lai?

"Na duh lo ahcun zaankhat ca menmen ah na ka duh silai caah ka bia ka laakțhan ko lai, nain mu

Kan hmuhka tekhan ka thinlungah hmunhma na rak la i kan rak i zahtuk, cucu na  thei lo. Cun atu bantuk in ka sinah duhnak bia na chim hi ka caah ka thilrit zantertu a si i na cungah kai lawm.''

Lunghmuihnak mit in ka hmaifang fek tein a zohpah in a thirpah mi thawchuah thawng he kan duh veko timi biafang hna cu hnakhaw hram ah ding tein a rak chim.

Lunglawmhnak timi hi ma zaan ko ahkhan dah ka cungah a rak ngan khun ko lai. Tlawmpal ah ka vunkuh i keimah lei deuh ah ka kawih, ai changpah mi thazaang he duhsah in keimah leiah aa rak thawn, a biang i a tla mi a samfa hna £zialmal tein ka vun hei piakpah khin a hmur ah ka hmur aa fuu cang, zeicaan aisih kan hngal lo, a thawchuah a rang, a vun i siamremh i a ka tlaihnak kut a vun rengh deuh ve.

Cuticun caan zeimawzat kan hman hnu ah''

Ka philh hlah mu timi biakam nak zeimawzat he an Centre(riahnak) tiang ka vung thlah.

Thaizing Suimilam pakua in

kan mawțaw ai thawh ding si. Ngunku kuttlaih manh loding ka ruahkhawh lo caah an centre lei ka hei fuh, an nih cu duhsah in tlung ding an si i inn lengah capo an rak sai salam ko. Kan kut kan i tlaih dih hnu ah dam tein mu tonțhannak caan umhram seh tiin, thinlung nih chim a rak duh lotuk mi hmurka in bai______bai kan rak i tuah.

Cuni cu a donghnak kan i hmuh siloin kumpi kumli chung caah Bai_____bai kan rak i tuah tu asi.

OoooòoooooooO