Teirialnak Loin Hmuitinh Phakkhawh Silo

Tuzaan cu a luancia ka notebook ka kau. Cahmai hramthok cem ah ka hmuh micu phaisa i khon dingin budget kai rak i suai mi asi. Cucu catlap cungah ka rak țial. Thlakhat ah mazat hi ka fim lai i kumkhat ahcun cuzat ka ngeih khawh lai timi khi a rak si. Khoika ah a karh in phaisa phumding ti hna hicu ka thluak nih a ruahawk a  hngalh lo pinah kuttum tiate kan thlahlawh hi phumawk hmanh a tlak mi cu asi reng hnga lo. Asinain tlawmpal te zong chiah sawhsawhnak cun khoika tal ah a karh in rakphum cu a țha deuh suamaua ko hnga.  

Tuzaan ka notebook ka vunzoh cu  a hmai ka khah loning, nungak cu sisehlaw a zoh hrim ka zoh ngam hnga lo😃Kan i relh lo karah kum tampi a liam manh cang. Cuchung ah zeidah ka tuah i zeidah khua le ram caah ka tuah mi si? Ka hmuitinh a ka țemtawn cemtu hi zeisatdah asi tihi ka ruat. Cu i kai fian micu  tuahsernak le zuamnak tal loin hmuitinh sawhsawh lawng ka rak ngei ti kai fiang. A fawinak in kan chim si ahcun tuahsernak le zuamnak nih a zulh lomi hmuitinh sawhsawh  ka rak ngei sual, cucaah kumkhat ah cuzat ka ngeihkhawh lai ka timi cu pakpalawng an rak siko.

Japan  dicnary ah (imposible) an ngei lo anti, a sullam cu'' asi kho lo'' timi kan ngei lo tinak  asi. Cucu an minung ruahnak a pical tuk ruang le zeihmanh asi kho dih timi an zumh caah asi. Cu bantuk cun Kawl phunthluk ah kan hmuh rih micu'' Kan i zuam ahcun Pathian hmanh kan si kho'' ti asi. Cu nih a chim duh micu i zuamnak le teimak nak nih zeitluk in dah hlawhtlinnak a chuahpi ti a kan chimh duh nak  asi. A caan le zuamnak nih hlawhtlin nak a kan pek cecua  ko nain kan mah nih teirial nak le semsi khah nak he nun zalam kan rak zawh lo caah teirialnak  i a nu asi mi vanțhatnak le hlawhtlin nak cu kan rak  hmukho taktak lo. 

Hi ka notebook ka kaunak thawngin ka ruah mi tete cu ka feibuk cahmai ah status tawi tein ka rak țial nain kai lungsi lo caah a sau deuh in ka vuntuam muai. Tutan ka cabia nih ai tinh micu Zeidang hlawhtlinnak siloin  phaisa lei hlawhtlin nak deuh asi lai.

Mizei hmanh nih teimak nak le zuamnak kan ngei lawnglawng ah teinak kan hmuhkhawh lai i kan hmuitinh kan phan kho lai ti hi kan i fian ngaingai a hau. Cu kan hmuitinh kan phaknak dingah fawi zaangtuk in kan ruah ding asi lo. Teimak le zuamnak nifa kan nun ah kan ngeihkhawh lawnglawngah cu kan hmuitinh cu kanphan kho lai.

Minung kan nunnak ah hmuitinh hi kan ngei vial. cu kan hmuitinh cu kan mah le kan pumpak chungkhar caah a țhabik dingin kan i thim mi hmuihtinh asi cio lai. Sir FrancisBacon nih ''Ruahchannak timi cu a tha mi thaithawh asi nain a tha lomi zaan riah zong asi kho'' Ati. Kan i ruahchannak ah hin tlamtlin lonak a um zungzal lai, cu tlamtlin lonak cu Francis Bacon nih a țha lomi zaanriah he a tahchunh. Cucaah kan kan tlamtlin lonak kha kan lehrul i nifa kan nunnak ah siseh, sianginn kan kai ah siseh,  phasa kan hman kan hmuh ah siseh, zeidah ka hmuitinh asi tikha kan nunah kan i sehchih ding rian kan ngei, hihi kan philh sual tawn lengmang i pingpalo kan su tawn. Mifimbia pakhat ah '' Ruahchannak a ngei lomi minung cu anu pawchung in a chuah lo ah a țha deuh'' an ti bang. Kan um kan kalnak ah kan ruahchannak hi philh loin i ken peng hna usih. Kan hmuitinh nak in kan i zuamnak a ngan deuh a hau, kan ruah minak in kan tuah mi a tam deuh a herh. Zeitik hmanh ah i zuamnak loin teinak hmuhkhawh asi lo, cu bantuk cun' teinak loin hmuitinh phanhkhawh asi ve lo. Phungdangin kan chim ahcun i zuamnak loin hmutinh lawng na ngeih si ahcun zungzatlak nak he neihniam tuk in nan um cang. Cu siloin hmuitinh lawng ngeih i tuahțuan țung lo ahcun vokpi hmai lungvaar thlak bantuk asi ko lai.

♥Kan Hmuitinh leiah Zeitindah Kar Kan Hlan Lai.

Minung nih tinh mi kan ngeihtik ah tuah loding, isum ding, thlakhat ah cuzat i zaat ding tiin rikhiah nak kan i tuah țheo tawn. Cucu a herh mi zong asi. Mipi lak ah  i ruang in  tlik ve kan duh tikah thil pakhat pakhat tlamtlin lonak le ka thazaang/kan i zuamnak a dorh tawn caah hnu kan tang i ka hmuitinh sinin kan hla ziahmah tawn. Hihi caan nih a liampi dih cang caah a luancia mi na tuahsernak kha na hmancia caan ah na chilh kho ti lai lo. Cucaah kan tancia caan chung i kan rak i palhnak le thazaangchuahnak dingah kan tha kan rak dorh, kan caan a lak in kan rak liamter mi, a herh lo ah phaisa kan hloh mipawl kha kan tanding mi thaizing caah fim a kan chimtu saya țhabik ah kan hman i caan sinah kan nunhlun kha kan thlen a hau. Barrir James nih a timi cu ''Caan aa thlen ningrup in aa thleng ve lomi cu, ei heu phurrit men an si'' ati. Kan palhnak kan i theih ko nain ka thlen lomi cu kan tlaunak lam a kau chin lengmang ticu a fiang. Tukum zong i kan i tinh mi kan khen lo i kan i palhnak, kan zia, kan remh hlei lo ahcun tukum nak in hmaikum ah kan hmuitinh he kan i hla chin lengmang lai. Cucu atu kan nunah sehchih in thazaang kan chuahchin a hau.

 donghnak bik ah, Hlawhtlin timi hi a fawi lo na theih lai. Cu a hartuk na theih mi nihcun zuamnak lungthin, thazaang chuahchinnak an ngeihter lai. Minung cu hlawhtling ding tein rian kan t'uan i, kan tlamtlinh taktak tikah kan lungdi a riam kho hlei lo anti tawn. Cucu hakkauh nak lung kan nun ah a kheuhchih caah si. Cowley Abaraham nih   ''Sifah le retheih nak nih hin a cheuchum te lawng a herh nain rumnak le hakkauh nak tu nih cun thil viarte hi a herh dih'' Ati. Kan hlawhtlin nak hi hakkauh nak ah kan hman sual ahcun a donghnak a phichuak cu pingpalo suk asi ko lai.  Cucaah a zatawk nun kan ngeih i thil si ning tein kan  cohlan thiam i kan pawngkam minung ngaitla tein kan nun lawnglawng ah kan hlawhtlin nak cu man a ngei lai.

i zuam, teirial, hlawhtlinnak cu na pawngte ah um zungzal.



Teirialnak cu vanțhatnak i anu asi {Cer Cantes}