Samaria Mițha Pa Le Ngaknu [Tontir]
Ka țin tawnnak lam in tuzaan zong Puma bag fate țangah i bei in ka țin caante ah ka țin, ka inn le ka rianțuannak hi ke in minit pa sarih kal asi nain mah lawng kal um cu thla vai a kiang ngai. Zalampi cungah ai chokvak mi mawțaw an king, zaandang malaysia a lo ruam lo. Zaan hlunpi ko a lo. Highways pakhat ka tan hnu ah kan inn lei cu ka neih ziahmah, caan tlawmpal ka kar ka hlan ah khin.
Bus-Stop ah a mah pi lawng a țhu mi minu pakhat i hlat ngai in ka hmuh. Ka lungthli in hi tluk zaantlai ah hin zei buss dah umti seh ti hnga tiin kai ceih lenbu khin a pawng ka phan, țha tein ka vunzoh ah Kawlram mi muisam a keng, zohnak ah thil pakhatkhat a cungah cang lai ti khi hngal khawh asi, a nun ah zeibantuk ruahchannak hmanh um hla sehlaw cuko cu a lo. Asam a kengcan , aa tet ngai mi yin bawngbi sau ai hruk i angki lehpiat te aa hruk. A thilhruk ai rem, ka lungthli in cu nu cu ai dawhtuk lai ti ka ruat. Uai hninghniang tekhin a totum in a țhu. ka chawn hnga mw chawn lo tiin kai el lio ah a țhutnak in a vuntho i ruahchannak nih a țilh tak cangmi mit au he ka lei ah karthum hrawng a vun hlan ah i a Malay holh pei nawn in a ka chawnh.
Zaangfah tein bawmh hal kan duh ko- buss cit kai palh i atu hi khawika asi zong ka thei lo, ka hawikom chawnhnak zongah phone phaisa ka ngei lo i na phone ka hlan law kai lawm ko hnga" tiin-
A holh le a hmaifang ka zohtik ah kawlram mi asilo Thailand asi lai ti ka ruah caah a bialet loin khawika ram mi dah na si tiin ka hal. Ka ruahcia bang Kawlram mi ka si ati. Keizong kawlram mi ka sive ka ti hnu ah tlawmpal a hmaifang ah lawmhnak ni a vun tlang. Kawlram mi kaa ti caah si men lai kawl holh in Kawlram khawika mi dah na si tiin a biahal a peh" ka thiamchunh kawl holh in Hakha Chin ka si tiin ka leh ve"
A lungdongh tuk hnu ah kanmah Lai kokek muihmai a hmuh caah si men lai a mirh kho huaha lomi a hmur mirhter khawh ai zuam, a ka in a chim lem lomi a mithmai ah tuzaan koko ahcun a chuahpi a ța nak in ka bochan ti a lang. Hakha holhkek tein keizong Hakha tah ka si ve cu. Maka hi na umnak maw si, khawika dah si ka hi" tiin a biahal a peh țhan.
Laiholh kekte ka theih lonak sau caah mw si hnga a Hakha holh ai dawhtuk in ka thei- a ka thawttuk.
Aka hal mi ka leh hnu ah, khawika um mi dah na si, ka ti-
Subang Jaya ah ka um, i Selayang ah rian ka țuan, atu hi ka rianțuan nak cun Subang ah zarh va hman kai tim i buss cit kai palh rua, na ka chimh hnu ceo in Kepong cu ka theih bantuk a lo. Nangmah kan ton cu ka hnangam tiah tawi fiang tein a ka leh.
A biachim holh rel ah a hnangam deuh ti cu a lang.
Subang Jaya le Kepong cu ai hlat pin ah atu cu a tlai cang 12:30AM ati cang. Buss chim lo Taxi koko hmanh a umti lo- zeidah ka bawmh khawh lai ti ka ruat. Bawmhding zongin ready te ka si. Ka inn ah ținpi ninglaw hi tluk a caah ruahchannak a bi cang mi ka biacu a ka el ngam lem lai lo nain khat lei kam in kei mah lila ka lungțha lo. Innkhan pakhat ah um mi ka si tik ah innpi ah ih awk țha lo, innkhan ihter ve tiah keimah ca ahcun a poinak um lem lo nain a caah thil har ngai asi ding ka theih.
Ka kutdong khin ka sawhpiak i kan pawng HOTEL khi na hmuko lo mw, a tlai cang i tuzaan cu ka khin i din law thaizing tuah pumhtanh in na ținte lai. HOTEL man zong a dengte zaankhat ah RM 69 lawng asi. A tangah Thai Restoren zong a um i an rawl zong a thaw ngai. Ka khin rawl zong va ei te ka ti i ka phaisa bawm chungin a rawl ei nak le thaizing a țin nak, Hotel hlan man a za lai ka ti tawk ka chuah i a kut ah ka chanh nain a ka hlang duh lo.
A hau lo ka U'
Nan inn ah riak awk țhat ahcun HOTEL nak in nan inn ah riah ka duh deuh, Cun' Hotel hlan zong ka thiam lo" aka ti-
A mah thei lo dingin Hotel hlan cu thiam hauh țunglo ka ti nain a hlan bal ve lo caah kai lawm. Keimah nih kan hlan pi lai ka ti i Hotel lei cun ka kal pi. Ke in ai chokvak mi mit nih hmuh ding an um ti lo. Zaandang bang malay thlapa vuavap in a ceu i vanlai ah a dir. Lamkam lekțhik meiceu nih kan kal nak zalam cungah zaan ai dawhnak an lawm hna. Kan pahnih artlang in kan kal, lamkam meiceu tangah ngaknu te vun zoh ahcun minung fa khum a lo-lo. Lasi le van ngaknu dara tiah zumh a fawite. A samtom a caorh lei liangah ai thlah i a țangan tiang a phan. A bag fate a țawk can phan dengin ai bei. A hmaithlak cu biazai țial thiam nih zei he dek an hei tahchunh hnga, a hmaithlak koko hmanh ah Biazai thong an țilh ter hnga.
Atu caan hi ruah siamsiam in a tlak ai lim ka te asi. Ruah hanka zongah Kuala Lumpur khua cung ai chong mi vankau pi cu khua dawm hna he an i tiam len rih. Aifi an langlo, thlapa nih zeiti pi Kuala Lumpur zaan hna ai dawhnak a tuammuai kho lo, lamkam lekțrik meiceu dah lo. Zei thawngpang hmanh a ring lo, chuaktak mi khua țhingpi ko a hluan. Dai tein biazong i ruah lem khin kan kar hlan kan peh. Minit pali hrawng kan kal ah khin HOTEL tang cu kan phan.
A ihnak ding khan tiang ka va thlah- A pawțam lai ti ka theih, a mah lawng rawl ei cu a zuam lo dingzong ka hngalh. Cucaah i kholh law inntang ah rawl kan ei lai ka ti. A ka zoh ah a hmur cu a mirhter nain ka hmai ka khap hlah sehlaw a lo, keimah lila ka siarem lo. Kan Lainu miram dangah hi tiang dirhmun an phak tik ah bawmhchanh cu ka rian asi. A lungretheih nak hna cu hlohpiak dih i nuam tein chiah ka duh. A zuam zong kai zuam.
Phahnah pante ai denh i kholhnak khan in a vunchuah pah khin na ka hngak kho lai lo ti ka phang i ka lucu kai țawl lo, ati. A hnuk ri in a elzim tiang cu țavel in ai men nain țavel nih a zawh lonak a taksa hna cu catlap bang raang celcul in- duh an nung, Uar na umtuk vunti duak ka duh nain ka rian a silo ti kaa theih caah kai thlohțhan. A bag fate chungin thilthlen ding a chuah hnu ah ai hruk, a rang muicu angki phur nih a elzim tiang lawg a huh- a tak cungah thil an cuangtuk, thilhruk eih zong a thiam. Zeihmanh a thuh lomi a hmai, ai chuahpi a hmur sente zoh ah ngai a tla, duh a nung..A hmai cu a zawl lei deuh asi nain a bop bantuk khin a um. Khuazing hi mah ngaknu muisam a ser lio ah a kutchuak heiti awk in a hmaithlak ai rem, makup thuh cia khi bang a hmaifang ah Apel muici sen-eu rong a cuang, ai dawhtuk. Zei bantuk pangpar he tahchunh siang dingin ai tuah lo. Ai chuahpi mi a hmur asen dilhdalh mi ko nih ai dawhnak phundang piin a chimphuan.
Tlawmpal ka hngah ah, keimah lei hoih in U" tiin a ka auh- nain zei biahmanh a chim lo. Kai har i ka zoh hnu ceo ah.
Mati hin țum ninglaw a poi maw? Duhsah tein a mirhpah khin a ka hal.
Ai zohnak ah sexxy deuh in ai hmuh i si men lai.
"Poi hlah nairem tuk" ti vial lawng ka comment.
Cuticun, i chawn lem loin Hotel tang Thai Restoren ahcun kan lut, kan hmaika ah menu pakhat veve sapuaițhu nu nih a kan chiah piak. Hika thai dawr hi ka ei tawn lengmang nak asi caah keimah duh mi cu fawi tein kai awder khawh, řianțuan tu pawl zong nih an ka theih ngai. An rawl a thaw i an menu Cover tete zong duh an nung, zohnak in a thaw ding le thaw lo ding hngalh khawh silo. A nih cu tawmpal akau luklak i cah awk ka thei lo nangmah ei mi paoh ka ei veko lai a ti i Menu cu khat le kam ah a fim. A sia rem lo tuk nain siarem tein le ngamhtlak tein um khawh aa zuam. Zeitindah asia cu rem reng hnga mu, a theih bal lomi pa he cabuai pakhat ah țhu in rawl ei ți cu nu pakhat caah a fawi mi řian silo.
Seafood deuh hi a duh men lai tiah siaherh ngai in Crispy Sotong le Tumyam Prawn ka cah piak. A rauh hlan ah duhsah tein kan rawlcah mi cu kan hmaika an vunhun ziahmah. Seafood deuh hi ka duh micu sikaw kan hmaika cabuai cungah Sotong le Ngaikuang, Nga a phunphun in kio mi le chumh mi tiin cabuai fate cung a khat nawn. Tlawmpal kan ei ah meh ai suah bal lo ka theih i Sotong ka hei suah.
"Aih ka U Seafood ka ei lo arti tuhi tam piin ka ei lai mu- a nem ngai mi a mit au dor nawn tein aka zoh pah in a chim.
"Aw ti dah lo- a duh lomi hnek cu kaa tim ve lo. Menu ka lak i a dang deuh i cah kun ka ti nain an Arti kio a crispy tuk i a thawtuk ko poilo- tam piin ka ei lai a ti i a hmaika arti tu ai suahchap.
Immmm---
A hmai ka khap lo, thiamthurh pi tiin keimah le keimah kai si. Ziah' hme Menu Cover ah Seafood a tam lengluang a hmuh ko nain Seafood ka ei lo ti zong a ka chimh hnga lo. Keimah zong nih ka rak hal dingte asi ti kai theih cu a tlaituk cang. Ka lungthli in na sualtuk ka ti. Ka eika thaw ve lo. Pahnih caah cah mi pakhat lawng nih ei dih cu a har.
Kan ei khim in kan konglam kan i chimh thlu lomi kan i ruah- A mah nih biahram a domh,
" Ka U' nangmah um hlah law zeitindik ka um hnga hi tluk zuri, sabah, misual tamlak ah hin- kai lawmtuk na ka nunh ko ati hnu ah siarem lo ngai khin a bia a peh, atu hi ka U kan ti ko i ka Nau deuh zong na sikho cucaah kan kum le kan min i chim usih law țha lo maw tiin keimah bialeh nak a hngak-
A tawifian nak in ka min le ka khua, Cun ka kum zong ka chimh hnu ah a mah nih ka bia a vunchar, ka U kan timi ka palh lo. Kei kum 18 ka tlin ka te si cucaah atu cu U Thawng tiin kan auh lai mu, ai dawhtuk mi a mittial in ka hmaifang fek tein a zoh, a hmur a mirhter. A pentuk lomi a hmur le a hatian an i rem. Tuzaan bantuk i ka hmaika ah panhte le mirh zimziam tein a țhut khawh hi kai lawm. Hawikom hlun bang a ka ngamhtlak ti ka theih caah kai lawm chinchin.
Kan sining kan i chimh dih hnu ah tuni a thilton mi kongah kirpi ka duh. Nau" U, na ka tive ko caah Nau kan ti veko lai mu.
Aw' ngah ko U Thawng,
a biafang nih zeibantuk sullam an zawi lo nain a Hakha holh a nem cun a thlum. U Thawng tiin a ka au bal mi an um lo caah a thawkhun in ka thei. Ka thinlung ah hmunhma a la, duhnak nih ai hmuka le ai thei ka tiin thleidan nak a rak ngei lo, duhnak cu a mitcaw anti bang a ton mi thil ah el-ah nak um loin fawi zaang tein a cohlan khawh ko rua. Duhnak timi ai fiangtuk cang mi Upa pi lungthin nih kan duhtuk ka nau ti colh a duh nain tuni bantuk caan ah ka duhnak langhter le chimh cu asi khawh chungin kai thloh. Phundang tuk in a ka ruah lai zong ka phang.
-Nau"
" feh tein a ka zoh pa khin.. Immm
"Hi hnu cu nangmah pakhat lawngin chawhvah hi asi khawh ahcun hrial i zuam mu. Hi tluk Zuuri le Misual an tamnak Malaysia ah hin mah lawng kal um cu isum ko. Ka thiam ko, ka kal khotuk ko tiin ralțhat ding silo. Mati ka ti tik ah țhihpheih ah na ruah sual men lai, Nu cu ța-vuan nan i lakkho lo ka ti duhnak zong silo. A humhim lo tuk mi ram ah kan țhutdir tik ah ral ring tein kan kal um a herh, a hlei in kan nih ralzaam minung hna hi an ram mi zohnak ah kan nauta tuk zeite hmanh ah a kan rel lo tik ah kan nunnak pakhat fir hi cu an caah thil har lotuk asi ticu ngakchia na siti lo caah na theihtuk ve ko lai nain mah lawng chawhvah cu kan siang lo-tiin ka sian lo nak le ka siaherhnak bia cu cat lo tein ka peh. A nih zong Cabuai cungah a kut ai sih i ngakchia lungfim ka te bang dai zimziam tein a țhu, ka hmaifang thlah loin a zoh.
Umm- U Thawng hi hnu cu a ngamh hrim zong ka ngamhti lai lo. Cun" tuzaan hi keimah chanhchuah tu dingah Pathian nih samaria mițha pa bantuk in an thlah mi na si men lai- ding tein a ni nain keicu phuhlut tiah ka nih kai thloh. Caan tawite kan umți chung a mirh caan tete mițhep tak ka sianglo. Ka hmuh ballo caah si men lai ai remtuk, capo saihpiak i a nih zoh peng ka duh. A lungretheihtuk hmanh ah aa dawh mi, a mirh chinchin ahcun lasi iang hla mw ai hlan ti awk khin ai dawh. Amak"
mit-au a dir'
hmurka a panh"
tikah thinlung cu phundang pi khin řian a țuan. A mithmul sau le mitțial dawh, a piang mi a mit autang ah a vaar hilhiar mi a ha-tian a vun langhter caan ah khin zoh cim loin ai dawh, mittha a dam, zaang a tlung. Cu ruangah tuzaan bantuk zarhte zaan i ka bat kai hngalh lo nak si men lai.
Kan biaruah a thawtuk nain ka kutcung nazi zoh lo awk a țha ti lo. A nih zong aba lai keizong thaizing rianțuam ding ka si. Ka kutcung nazi ka zoh 3:30AM ati cang
"Nau, na ba lai vakai law vaidin cang keizong ka țin ve lai. Cun" thaizing zong kan i hmukho te men lai lo dah pumhtanh in lawi na duh țung lai i ka ti pahkhin ka kut ka chanh nain a kut bal a ka chan lo.
"U Thawng nangmah he umți ka vuai rih lo nain na hmai kan khap lo. Inn hmanh țin loin keimah na ka fimtawl nak ah na batuk lai, Kai lawmtuk. Ati hnu ah a kut a ka chanh nain fawi ah ka kut ka chan kho veti lo. A donghnak kan i hmuh asi lai ti ka phang, kan kut kan i tlaih dih i mangțha kan i cah hi a donghnak mangțha kan i cah zong si kho tiin ka ruat. A kut a ka chanhnak asau le sau lo zong tuak lem loin ka khuaruah tu ka peh- țhending ka sian lo tuk kai fiang- ka nunnak ah zingzaan ka dawp mi thawtluk in a biapit zong ka hngalh. Ka lungthli in a donghnak kan i hmuh cu sihram hlah seh tiin Khuazing ka nawl.
A nem mi aw in U Thawng ka philh deng, na phone no ka țhenta law kai lawmko hnga.
Ka thaw fak nawn piin ka chuah hnu ah phone tah a um tak kha phone chungin i pehtlaih khawhtuk asi- atu ceo ah ka lunglem. Ruahchannak tharte zong a ka pek. Ka phone number cu ka pek Cun" a ph number zong hal hau loin a ka chimh.
Cuticun- kan kut kan i tlaih i mangțha kan i cah hnu ah a voikhatnak cu kan i țhen.
Inn ka țin, kai kholh hnu ah a mah kong ruat in caan ka hmang. A ih siarem hnga maw, a mitkuh hna teh thaw hnga maw tiin ka ruat. Ka nau" caah tuni cu a lungretheih tuk ni, a vansan tuk ni siko nain kei caah cun kan i tong i kai lawm. Phone zong hei chawnh i na tlamtling in na siarem maw tiah hal ka duhtuk ko nain mang a manh lio hna ah ka țhangh sual lai ti ka phang i kai let țhan. Cuzaan cu a mah kong ruat bu tein kai hngilh.
Thaizing ka thawh hlan ah ph a rak ka call nain ka tlaih piak khawh lo caah-
Hiti hin ca a țial.
Hello'
U Thawng na phone ringtone aw nih an țhangh khawh lo maw si nizan keimah na ka kilkawi nak na ih tlai in na cei deuh caah dek si? Zei asi paoh ah na cungah kai lawmhnak hi chim len hmanh ninglaw ka lungdi a riam kho ding si hlei lo, kai lawmtuk. Kai lawmtuk U Thawng. Nizaan zong ka ih a thaw ka siarem tuk, siarem loin na um sual lai ka phang, ka mangzong ah kan hmuh nolh nain cain țial ahcun kan hmuhnak kong hna cu asau lai caah voidangah kan chimhte lai mu. Zing 7:00AM in ka tho, nizaan i na ka țhenhta mi phaisa te khan țaxi ka hlan i atu hi țaxi cungin cakuat ka vun țial asi. U Thawng, na sin um ka vuai lo na lungthin a thiang na țha tuk, Cun" ka caah na sunglawituk nangmah bantuk pa hi hawikom lawng siloin dawtu dingah i hmuhkho ve ning ti ka duh. Nikhatkhat ah kan i tongțhan hrim lai tonnak caan na ka pekkhawh lo hmanh ah keimah nih kan ton lai-- keimah lawng lenvah na ka sianh lomi kha kai philhter lai:-) Mangthaw te he rak tho mu U Thawng, phone kan i chawn lengmang lai mu.
(Ka caah Samaria Mițha Pa Bantuk U Thawng)
Tiin
a cakuat a donghter.
Comments
Post a Comment