Flight No- 2016
Caan tlawmpal te lawng kan ngei cang. Atu hnu suimilam 12 hlan i na thihhraw lo ahcun hi Flight No-2016 ah hin na duh zong duh lo zongah nai cit ve hrimhrim lai. Cu ruangah cun hi Flight ai cit ding hna caah a biapi ngai mi hngalh awk țhenkhat ka hun langhter.
( 1 ) Flight No- 2016 hi a ho hmanh nih an icit rih lomi a tharbak asi ko nain i ralrin paoh a țhat ko caah thilrit ken a ngah lai lo. Na thilrit lakah a tanglei thil hna hi hlonh an hauh caan ah hlonhcolh dingin timhcia tein an um awk asi lai.
- Huatnak
- Thinhunnak
- Mi zeirel lonak
- Hnachuahnak
- Haakkauh nak
- Vawlei taksa mitthitnak
- Hurnak le lernak
- Mah zawn lawng i ruahnak
- Lihchim
- Hlenthawinak le mi palhnak kawl.
2nk- Mi tampi hna nih hi Aarheaven 2016 hi cit an duhtuk cio nain an nunnak nih a tlinhti lomi tampi an um. Nang le keicu Pathian tiket a kan pek sianko ahcun aa cit dingmi ah i ruat in ruahchannak he timhcia tein um hna usih. Checkin caan a naituk cang. Tiket na neih lo zongah a chungah Secrity pawl nih a kan chek țhan lai caah Secrity pawl nih akan khirh lonak dingah hlonh a hau mi thil paoh hlonh cio hna usih.
3nk- Passenger pawl nih hnangam tein i cit hi kan duhbik mi asi tawn. Cun, kan hngalh cio bangin hi Flight No-2016 hi thla 12 chung din loin a zuang dingmi asi. Aa cit dingmi hna hi miphun kip le ramkip in kan si lai caah pasenger hna lakah remnak, lungrualnak, dawtnak ngeih hi a herh ngai mi an si. Cuti asi lo sual ahcun lam tantim ah kan buai suallai i kan i timh mi ram kan phankho suallai lo. Tiphan um ngai ngai.
4nk- Zeitik caan paoh ah hatnak tongkho kan si ruangah passengger pawl nih kan phone(thlacamnak) kan on pengawk asi lai. Zeitik caan paoh ah kan phaknak hmun le kan umning vialte hi kan panhmi ram, vanlei ahkhin heikuat lengmang asi lai.
5nk- Asi ne le, kan tlai deuh cang ruangah kan i cit dingmi Flight hi rang taktak in zuanter asi lai i vanchiat ah harnak kan ton sual zongah kan himnak bik cu kan seat belt(Jesuh) kha asi. Cucaah fek tein kan i hren chihawk asi lai.
6nk- Kan i cit mi Flight chungah hin vawlei thilri asi mi zeipaoh zong tuahkhawh asi bantuk in Thlarau lei thil zong a duh mi paoh tuahkhawh țhiamthiam asi lai. Zei thil hmanh khap nan si lo caah nan duh mi thil paoh zalong tein nan tuahkhawh ko. Asinain kan umning(tuah) mi vialte hi video in thlak dih asi lai caah kan i timh mi ram (Van) kan phaktik ahkhin mizapi mithmuh ah chuah(piah) site lai.
7nk- Passenger vialte nih nuam tein nan umkhawhnak hnga kan i zuam lai.Asinain vanchiat kan tonsual zongah "kan rak i ralrin lo caah asi" tiah kan ti nak hnga lo, atu thok hin ralring tein um cang hna usih.
8nk- A hohmanh nih an phak ballo nak ram kan i culpi hna lai caah nuamhnak le lawmhnak tampi nan ton lai. Cun' ngeihchiatnak le harnak zong nih an rak don peng ve hna lai. Cu tikah zeibantuk dirhmun paoh phan in zeithil nan ton zongah lunglawm tein cohlan khawh nan i zuam awk asi lai. Kan nih zong hi ram hi kan phak bal ve lo caah kan i bochan mi cu cunglei biacah Infotmation a ra mi lawng asi. Cucaah kan phone(thlacamnak) kan on peng ahau lai.
9nk - Chungkhar tlingin, nuam tein Flight No- 2016 hi nan rak i citcio khawhnak hnga thla kan rak in campiak hna. Aho hmanh nih an cul ballonak hmun kan cul lai caah a caan ahcun tukforhnak thlichia khuadawm tang hna ah kan valut(zuang) a hau te lai. Cucaah cun na seat belt(Pathian) kha fek tein nan i hrenchih nak kan vun cah țhan duh hna.
10nk- Flight No- 2015 zongah him tein a kan hruaitu nihkhan Flight No- 2016 zong hi him tein a kan hruai țhan hrim lai tiah ruahchannak kan ngei. Bawipa nih thluachuah inpe hna seh.
Flight No- 2015 nai ci lio i harnak, ngeihchiatnak, tukforhnak na ton mi cu Flight No- 2016 nai cit dingmi caah fim an chimtu, lam an hmuhsak tu le thluachuah an phurtu sihram hna seh.
Comments
Post a Comment